Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 187 Hüküm no: 236 Orijinal metin no: [36a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âmine bt. Adalı Mehmed Reis’in miras kalan eve ait kendi hissesini İsmail Beşe b. Mahmud’a sattığı Vilâyet-i Anadolu’da medîne-i İznikmid mahallâtından İdrisler Mahallesi’nden olup hâlâ Kasımpaşa’da Yel değirmeni Mahallesi’nde sâkine olan Âmine bt. Adalı Mehmed Reis tarafından husûs-ı âti’l-beyânı ikrâra vekîl olup vekâleti hasm-ı câhid-i şer‘î mahzarında mezbûrenin zâtını ma‘rifet-i şer‘iyye ile ârifân olan Mehmed Beşe b. Sadi ve el-Hâc Receb b. Hüseyin şehâdetleriyle şer‘an vekâleti sâbite olan li-ebeveyn karındaşı Halil Beşe meclis-i şer‘-i hatîr-i lâzımü’t-tevkīrde işbu râfi‘u’l-kitâb İsmail Beşe b. Mahmud mahzarında bi’l-vekâle ikrâr-ı tâm ve takrîr-i kelâm edip müvekkilem mezbûre Emine Hatun zikrolunan İdrisler Mahallesi’nde vâki‘ iki tarafı Şankir? Ahmed Çelebi mülkü ve bir tarafı Yerlioğlu mülkü ve bir tarafı tarîk-i âm ile mahdûd olup üç bâb fevkānî odaları ve sofaları ve fırını ve hadîkayı ve bi’r-i mayı müştemil olup menzilde mülk-i mevrûsu olan semen-i şâyi‘ini mezbûr İsmail Beşe’ye beş bin nakd râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi minvâl-i muharrer üzere iştirâ ve kabûl eyledikden sonra semeni olan meblağ-ı mezbûr beş bin akçeyi yedinden bi’t-tamam ahz u kabz eyledikden sonra mebî‘-i mezbûru mahallinde teslîme mezbûr İsmail Beşe’yi teslît eyledi, ba‘de’l-yevm mülk-i müşterâsı olmuşdur, keyfe mâ yeşâ’ ve yehtâr mutasarrıf olsun dedikde vekîl-i mezbûr Halil Beşe’yi ikrâr-ı meşrûhunda el-mukarru lehü’l-mezbûr İsmail Beşe vicâhen tasdîk ve şifâhen tahkīk etmeğin mâ-hüve’l-vâki‘ gıbbe’t-taleb ketb ü sebt olundu. Fi’l-yevmi’s-sâlis ve’l-ışrîn min-şehri Rebî‘i’l-evvel li-sene erba‘a ve sittin ve elf. Şuhûdü’l-hâl: Abdülbâki Beşe b. Abdülkerim, Hasan Beşe b. Ebîbekir, İsmail Beşe b. Derviş, Yusuf yazıcı, Mehmed Beşe b. Süleyman, İbrahim Çelebi b. Davud, Muslı Çelebi, Ramazan b. Yusuf ve gayruhum.