Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 188 Hüküm no: 237 Orijinal metin no: [36a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan bt. Şaban’ın davacı olduğu Yorgi’yi mahkemeye getirdiği Husûs-ı âti’r-rakīm mahallinde ketb ü terkīm olunmak iltimâs olunmağın savb-ı şer‘den irsâl olunan mevlânâ Ârif Mehmed Çelebi mahmiye-i İstanbul’da Timurtaş Mahallesi’nde İsmihan bt. Şa‘ban nâm hatunun sâkine olduğu menzile varıp zeyl-i kitâbda mastûrü’l-esâmî Müslimîn huzûrlarında akd-i meclis-i şer‘-i şerîf eyledikde mezbûre İsmihan meclis-i mezbûrda işbu bâ‘isü’l-kitâb Mehmed Efendi b. Mehmed el-imâm mahzarında ikrâr-ı tâm ve takrîr-i kelâm edip işbu hâzır bi’l-meclis Yorgi nâm Nasrânî ile da‘vâ-yı şer‘iyyem olmağla mezbûru hîn-i mutâlebede meclis-i şer‘a ihzâr etmek üzere merkūm Mehmed Efendi nefsine kefîl olmuşdu. Hâlâ kefâleti hasebiyle merkūm Yorgi’yi meclis-i mesfûrda bana teslîm etmekle merkūm Mehmed Efendi’nin zimmeti kefâletden berîü’s-sâha olmuşdur dedikde gıbbe’t-tasdîkı’l-mu‘teber vâki‘ hâlî mevlânâ-yı mezbûr mahallinde tahrîr ba‘dehû cânib-i şer‘den ma‘an irsâl olunan Abdurrahman Çelebi ve el-Hâc Şa‘ban nâm kimesneler ile bile meclis-i şer‘a gelip vukū‘u üzere inhâ ve takrîr etmeğin mâ-vaka‘a bi’t-taleb ketb ü sebt olundu. Fî-18 min-şehri Rebî‘ülevvel sene 1064. Şuhûdü’l-hâl: Mehmed b. Ramazan, Mehmed b. Hüseyin, Mehmed b. Mehmed, Yusuf Çavuş el-mübâşir, Ahmed b. Abdullah, Hasan b. Haydar.