Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 189 Hüküm no: 238 Orijinal metin no: [36a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Abdi Efendi’nin kölesinin vârisleri tarafından âzat edildiği Dârü’l-hilâfeti’l-aliyye Kostantıniyyeti’l-mahmiyede Zeyrek Mahallesi’nde sâkin olup bundan akdem civâr-ı rahmet-i Rahmân’da cây-gir olan Abdi Efendi merhûmun verâseti zevce-i metrûkesi mefharü’l-muhadderâti’l-mükerreme Râbia Hatun binti’l-merhûm el-Hâc Mehmed’e ve sulbî kebîr oğlu umdetü erbâbi’t-tahrîr ve’l-kalem zübdetü ashâbü’t-takrîr ve’r-rakam bi’l-fi‘il Ağriboz mukāta‘acısı olan Mehmed Efendi’ye ve sulbiye kebîre kızı umdetü’l-muvakkarâti’l-mufahhama Hâmide <> nâm bikr-i bâligaya münhasıra olduğu şer‘an sâbit ve zâhir oldukdan sonra mûmâ-ileyh Mehmed Efendi asâleten ve merkūmetân Râbia Hatun ve Hâmide taraflarından husûs-ı âti’l-beyâna vekîl olup vekâleti hasm-ı câhid-i şer‘î mahzarında nehc-i mu‘teber ve şer‘î üzere sâbite olmağın vekâleten meclis-i şer‘-i hatîr-i lâzımü’t-tevkīrde işbu rıkkına mu‘terif olan uzun boylu, açık kaşlı, elâ gözlü, ak benizli mülk-i mevrûsları olan Rusiyyü’l-asl râfi‘u hâze’l-kitâb Yusuf b. Abdülvehhab mahzarında ikrâr u i‘tirâf edip ıtk-ı rakabât a‘zam-ı kurubât ve sebeb-i fevz ve necât ve vesîle-i duhûl-i cennât-ı âliyât olunur mu‘takın ıtkı mukābelesinde mu‘tıkın uzvu nârdan âzâd olduğu hadîs-i şerîfinin mazmûn-ı latîfine ıttılâ‘ım olmağın mevsûf-ı mezbûr Yusuf’u asâleten ve vekâleten tahrîr [ve] i‘tâk edip rakabesini mülkümden âzâd ve ihrâc ve sâir ahrâr-ı asliyyîne idrâc eyledim, ba‘de’l-yevm mevsûf-ı mezbûr Yusuf sâir ahrâr-ı asliyyîn gibi hür olup üzerinde velâdan gayrı hakkım kalmadı dedikde mâ-vaka‘a kayd şüd. Fi’l-yevmi’s-sâdis ve’l-ışrîn min-Rebî‘ülevvel sene 1064. Şuhûdü’l-hâl: Umdetü’l-emâcid ve’l-ekârim câmi‘ü’l-mehâmid ve’l-mekârim Nuh Bey b. Hüseyin Paşa, umdetü’l-müderrisîn Mehmed Efendi, umdetü erbâbi’t-tahrîr Mehmed Efendi kâtib-i sultânî, Mustafa Bey el-cündî, Mehmed Ağa el-cündî ve gayruhum.