Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 189 Hüküm no: 239 Orijinal metin no: [36b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Abdi Efendi’nin cariyesinin vârisleri tarafından âzat edildiği Dârü’l-hilâfeti’l-aliyye Kostantıniyyeti’l-mahmiyede nefs-i Zeyrek nâm mahallede sâkin olup bundan akdem civâr-ı rahmet-i Rahmân’da cây-gir olan Abdi Efendi merhûmun verâseti zevce-i metrûkesi fahrü’l-muhadderâti’l-mükerreme Râbia Hatun ibneti’l-merhûm el-Hâc Mehmed ve sulbî kebîr oğlu umdetü erbâbi’r-rakīm zübdetü ashâbi’t-takrîr ve’l-kalem bi’l-fi‘il Ağriboz mukāta‘acısı olan Mehmed Efendi’ye ve sulbiye-i kebîre kızı zahru’l-muhadderâti’l-mufahhama Hâmide Hatun nâm bikr-i bâligaya münhasıra olduğu şer‘an sâbit ve zâhir oldukdan sonra <> mûmâ-ileyh Mehmed Efendi asâleten ve merkūmetân Râbia Hatun’un ve Hâmide Hatun taraflarından husûs-ı âti’l-beyâna vekîl olup vekâletleri hasm-ı câhid-i şer‘î mahzarında nehc-i mu‘teber-i mer‘î üzere sâbit olmağın vekâleten meclis-i şer‘-i hatîr-i lâzımü’t-tevkīrde işbu rıkkına mu‘terife olan uzun boylu, açık kaşlı, elâ gözlü, sarışın, Rusiyyetü’l-asl râfi‘atü’l-kitâb Gülistan bt. Abdullah mahzarında ikrâr u i‘tirâf edip mûrisimiz müteveffâ-i mezbûrdan irsen intikāl edip mülk-i mevrûsumuz olan mevsûfe-i mezbûre Gülistan’ı hasbeten lillâh ve hasbeten li-rûhi rasûlihi’l-mu‘allâ asâleten ve vekâleten tahrîr ve i‘tâk edip rakabesini zîk-ı rıkdan ihrâc ve kazâ-i hürriyete ilhâk eyledim, ba‘de’l-yevm mezbûre Gülistan sâir ahrâr-ı asliyyât gibi hürre olsun, üzerinde velâdan gayrı bir hakkımız kalmadı dedikde mâ-hüve’l-vâki‘ ketb olundu. Fi’l-yevmi’s-sâdis ve’l-ışrîn fî-şehri Rebî‘i’l-evvel li-sene erba‘a ve sittin ve elf. Şuhûdü’l-hâl: Rıdvan b. Abdullah.