Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 190 Hüküm no: 240 Orijinal metin no: [36b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Mehmed’in Hümâ Hatun Vakfı’na olan borcunu ödemesi Vilâyet-i Rumeli’nde medîne-i Yenişehir’de merhûme olan Hümâ Hatun’un mahmiye-i İstanbul’da Ebu’l-feth Sultan Mehmed Hân -tâbe serâhu- câmi‘-i şerîfinde kırâet olunan eczâ-i şerîfe için vakfeylediği nukūda berât-ı şerîf ile bi’l-fi‘il mütevellî olan Haver Çavuş b. Abdullah meclis-i şer‘-i hatîr-i lâzımü’t-tevkīrde kazgancı tâifesinden olup medîne-i Eyüb Ensârî -radiyallâhu’l-Bârî- mahallâtından Kavascılar Mahallesi’nde sâkin olan Hasan b. Mehmed mahzarında üzerine da‘vâ edip vakf-ı mezbûr için cihet-i karz-ı şer‘îden yüz kıt‘a riyâlî ve yine târîh-i kitâbdan iki sene mukaddem cihet-i karz-ı şer‘îden yüz kıt‘a riyâlî guruş ve yine târîh-i kitâbdan mâl-ı vakf-ı mezbûrdan iştirâ ve tesellüm eylediği bir koyu deve tüyü kâtibî yenli atlas sincab sâye çuka ferâce bahâsından otuz kıt‘a riyâlî guruş mezkûr Hasan’ın zimmetinde vakf-ı mezbûra deyn-i vâcibü’l-edâsı vardır, suâl olunup tevliyetim hasebiyle cânib-i vakıf için alıverilmek matlûbumdur dedikde gıbbe’s-suâl mezbûr Hasan cevâbında fi’l-hakīka meblağ-ı mezbûr yüz otuz kıt‘a riyâlî guruş vech-i muharrer üzere cânib-i vakf-ı mezbûra vâcibü’l-edâ ve lâzımü’l-kazâ deynimdir deyü ikrâr u i‘tirâf eylemeğin mûcebince meblağ-ı mezbûr yüz otuz riyâlî guruşu cânib-i vakıf için mütevellî-i mezbûr Haver Çavuş’a edâ etmek üzere merkūm Hasan ilzâm olundu, mâ-hüve’l-vâki‘ gıbbe’t-taleb ketb olundu. Fi’l-yevmi’s-sâdis ve’l-ışrîn min-şehri Rebî‘i’l-evvel li-sene erba‘a ve sittin ve elf. Şuhûdü’l-hâl: İbrahim Çelebi b. Davud, Rıdvan [b.] Abdullah, el-Hâc Şa‘ban b. Mustafa, Mehmed b. Hüseyin mumcu, Muharrem b. Mehmed.