Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 191 Hüküm no: 241 Orijinal metin no: [36b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülhalim Ağa’nın İsak v. David’e olan borcunu taksitle ödeyeceği Dergâh-ı âlî müteferrikalarından kıdvetü’l-emâsil ve’l-akrân Abdülhalim Ağa b. el-Hâc Mehmed meclis-i şer‘-i hatîr-i lâzımü’t-tevkīrde Sirosen cemâ‘atinden işbu bâ‘isü’r-rakīm İsak v. David nâm Yahûdi muvâcehesinde ikrâr-ı tâm ve takrîr-i kelâm edip mezbûr İsak ile beynimizde ilm-i şer‘î ile ma‘lûm olup müşterâ ve makbûzum olan emti‘a-i mütenevvi‘a bahâsından ve cihet-i karz-ı şer‘îden cem‘an yüz seksen bin akçe [çıkma derkenâr] “cem‘an yüz seksen bin akçedir sah” deynim olup meblağ-ı mezbûrdan altmış bin akçesini ceddim merhûm ve mağfûrun-leh Rüstempaşa Evkāfı’ndan berât-ı şerîfle mutasarrıf olduğum vazîfemden her otuz gün tamamında bin akçe mütevellîsinden almak üzere mezbûr İsak kabûl edip hâlâ zimmetimde yüz yirmi bin akçe hakkı bâkī kalmışdır, meblağ-ı mezbûr yüz yirmi bin akçe mezbûr İsak’a el-ân lâzımü’l-edâ ve vâcibü’l-kazâ deynimdir dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’s-sânî min-şehri Rebî‘ülâhir li-sene erba‘a ve sittin ve elf. Şuhûdü’l-hâl: Fahrü’l-müderrisîn Hasan Çelebi b. el-Hâc Mehmed, İsmail Efendi b. ( ) el-kâtîb, Mustafa Efendi b. ( ), Ali Beşe b. ( ) çukadâr, el-Hâc Şa‘ban b. Mehmed, Mehmed Çelebi b. Hüseyin, Kara Halil b. Ahmed, Muharrem b. Abdullah.