Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 191 Hüküm no: 242 Orijinal metin no: [37a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Çelebi ve Ahmed Çelebi’nin babalarından kalan tarlaların tasarruf hakkını Abdürrahim b. Abdülkerim’e sattıkları Mahmiye-i İstanbul’da Hoca Hayreddin Mahallesi sükkânından Osman Çelebi ve Ahmed Çelebi b. el-Hâc Ebîbekir nâm müstakīmler? mahfil-i şer‘-i şerîfde işbu sâhibü’l-kitâb Abdürrahim b. Abdülkerim nâm kimesnenin sagīr oğlu ve tasdîk-i âti’z-zikre vekîl-i şer‘îsi olan Abdülhalim muvâcehesinde herbiri ikrâr u i‘tirâf edip vilâyet-i Anadolu’da Hamid sancağında Barla kasabası kurbünde vâki‘ inde ahâlî’d-diyâr ma‘lûmü’l-hudûd ve’l-mikdâr olup babamız müteveffâ-i mezbûrun hâl-i sıhhatinde tasarrufunda hâlâ tasarrufu bize intikāl eden tarlalarımızın hakk-ı tasarruflarını sâhib-i arz ma‘rifetiyle on beş bin dört yüz akçe mukābelesinde ferağ ve tefvîz, mezbûr Abdülhalim dahi vekâleti hasebiyle tefevvüz ve kabûl eyleyip bedel-i mersûm olan beş bin dört yüz akçeyi yedinden bi’t-tamam her birimiz ahz u kabz edip zikr olunan tarlaları mahallinde tasarruf ve tesellüme mezbûru taslît eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb ü sebt olundu. Fî-evâili Rebî‘ülâhir li-sene erba‘a ve sittin ve elf. Şuhûdü’l-hâl: Halil b. İbrahim, Ömer b. Mustafa, el-Hâc Hasan b. Hüseyin, Mehmed b. Ahmed, Ali Beşe b. Mehmed, Mehmed Beşe b. Mahmud, Mustafa Çelebi b. Receb ve gayruhum mine’l-huzzâr.