Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 192 Hüküm no: 244 Orijinal metin no: [37a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Muhtar Efendi’nin borcu olduğu Diyâr-ı Mağrib’de muvakkaten Cerbe kādısı olan es-Seyyid Muhtar Efendi b. es-Seyyid Ömer meclis-i şer‘-i hatîr-i lâzımü’t-tevkīrde hâlâ diyâr-ı Mağrib’de sâkin olan el-Hâc Yusuf b. el-Hâc Süleyman’ın vekâlet-i mutlaka ile vekîl-i şer‘îsi olan işbu bâ‘isü’l-kitâb el-Hâc Abdullah b. Ali es-Seb‘a mahzarında ikrâr-ı tâm ve takrîr-i kelâm edip müvekkil-i mezbûr el-Hâc Yusuf’un vekîli olan mezbûr el-Hâc Abdullah yedinde olan mâlından târîh-i kitâbdan sekiz ay tamamına müeccel ve mev‘ûd her vakıyyesi birer kıt‘a riyâlî guruş ile yirmi sekiz buçuk akçeye olmak hesâbı üzere bin kıt‘a riyâlî guruşa yedi yüz kırk sekiz vakıyye kahve iştirâ ve kabz edip yedinde olan deyn temessüküm mûcebince sekiz ay tamamında edâ olunmak üzere müeccel ve mev‘ûd müvekkil-i mezbûr el-Hâc Yusuf’a bin kıt‘a riyâlî guruş edâsı lâzım deynim vardır dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb ü sebt olundu. Fi’l-yevmi’l-âşir min-şehri Rebî‘ülâhir li-sene erba‘a ve sittin ve elf. Şuhûdü’l-hâl: el-Hâc İsa b. Abdülmümin, Fakih Yusuf b. Yahya, Said b. Fakih Kasım, Zülfikār b. Abdullah ve gayruhum mine’l-huzzâr.