Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 193 Hüküm no: 245 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin Odunkapısı’ndaki odaların kiralarını toplamak üzere vekili olan İbrahim Beşe’de alacağı olduğu Mahmiye-i İstanbul’da Sultan Bayezid Mahallesi’nde sâkin işbu râfi‘u’l-kitâb Mehmed Çelebi b. Ramazan mahfil-i şer‘-i şerîfde İbrahim Beşe b. Abdullah mahzarında üzerine da‘vâ edip mahmiye-i mezbûrede Odunkapısı dâhilinde vâki‘ icâre-i mu‘accele ve müeccele ile mutasarrıf olduğum odalarda müstecirlerden hâsıl olan icârâtı cem‘ ve tahsîl ve bana îsâle mezbûr İbrahim Beşe’yi tarafımdan vekîl nasbedip ol dahi vekâlet-i mezbûreyi kabûl eyledikden sonra vekâleti hasebiyle cem‘ ü tahsîl eylediği meblağdan ba‘de külli’l-hesâb yedinde bin yüz akçe hakkım kalıp meblağ-ı mezbûr edâsı lâzım deyni olduğunu şuhûd mahzarında ikrâr dahi etmiş idi. Hâlâ vermede ta‘allül eder, suâl olunup alıverilmesi murâdımdır dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden el-Hâc Yusuf b. Abdullah ve el-Hâc Ahmed b. Süleyman nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka mezbûr İbrahim Beşe bizim huzûrumuzda zikrolunan odalar icâresinden müdde‘î-i mezbûra ba‘de külli’l-hesâb bin yüz akçe edâsı lâzım deynim vardır deyü ikrâr u i‘tirâf eyledi, biz bu husûsa şâhidleriz şehâdet dahi ederiz deyü herbiri edâ-yı şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince meblağ-ı mezbûrun edâsı’çün mezbûr İbrahim Beşe’ye tenbîh olunup mâ-vaka‘a bi’t-taleb ketb olundu. Fi’l-yevmi’s-sânî aşer min-şehri Rebî‘ülâhir li-sene erba‘a ve sittin ve elf. Şuhûdü’l-hâl: Pîrî Beşe b. Hüseyin, Davud Çelebi b. Ali, İbrahim Çelebi b. Davud, Rıdvan b. Abdullah ve gayruhum.