Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 193 Hüküm no: 246 Orijinal metin no: [37b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sekizinci cemaatin mühimmatına vakfedilmiş olan paradan borç alan Ali Paşa’nın vakfa borcunu ödemesi Vaka‘a’l-ihbâr hâkezâ an-muhbirin mu‘ayyenin ledâ nemekahü’l-fakīr ilallâhi azze ve alâ Muhammed b. eş-Şeyh Muharrem el-müvellâ hilâfeten bi-mahkemeti Ahi Çelebi bi-medîneti Kostantıniyye el-mahmiye Husûs-ı âti’r-rakīm mahallinde ketb ü terkīm olunması’çün bi’t-taleb irsâl olunan mevlânâ Abdulkādir Efendi mahmiye-i İstanbul’da Rammâl çeşmesi kurbünde Bezzâz Mahallesi’nde sâkin işbu bâ‘isü’l-kitâb Mehmed Ağa b. Mustafa’nın menziline varıp zeyl-i kitâbda mastûrü’l-esâmî olan Müslimîn huzûrlarında akd eylediği meclis-i şer‘-i şerîfde sabıkā vezâret ile Kastamonu sancağına mutasarrıf olan düstûr-ı mükerrem müşîr-i müfahham Ali Paşa hazretleri mûmâ-ileyh Mehmed Ağa mahzarında ikrâr-ı tâm ve takrîr-i kelâm edip müşârun-ileyh Mehmed Ağa’dan bi’l-fi‘il mütevellîsi olduğu Sekizinci cemâ‘atin mühimmâtına mevkūfe olan nukūddan bin yetmiş bir senesinde altı yüz kıt‘a riyâlî guruş iktirâz ve tesellüm edip mukābelesinde yirmi aded zırh ve beşer çift kolçak ve on bir aded zırh külâhı ve on tüfenk ve yedi aded yaldızlı kalkan yedeği rehin vaz‘ edip ol dahi irtihân ve tesellüm eylemiş idi. Hâlâ rehân-ı mezbûreyi merkūm Mehmed Ağa’dan alıp işbu Ömer Ağa b. Mansur’a dört yüz riyâlî guruşa safka-i vâhide ile bâtten bey‘ ve teslîm ve kabz-ı semen eylediğimden sonra meblağ-ı mezbûru zikrolunan altı yüz guruş deynimden dört yüz guruşa mahsûb olmak üzere mûmâ-ileyh Mehmed Ağa’ya def‘ ü teslîm eyledim ol dahi kabz ve tesellüm eyledi, el-ân zimmetimde cânib-i vakf-ı mezbûra iki yüz riyâlî guruş lâzımü’l-edâ ve vâcibü’l-kazâ deynim bâkī kaldı dedikde mûmâ-ileyh Ali Paşa hazretlerinin minvâl-i muharrer üzere cârî ve sâdır olan ikrâr ve takrîrini el-mukırru lehü’l-merkūm Mehmed Ağa vicâhen tasdîk ve meblağ-ı mezbûr dört yüz guruşu dahi kabz ve tesellüm eylediği şifâhen tahkīk etmeğin vâki‘ hâli mevlânâ-yı mezbûr mahallinde tahrîr ba‘dehû cânib-i şer‘den ma‘an irsâl olunan Ahmed Çelebi ve Hüseyin Beşe ile gelip herbiri inhâ ve takrîr etmeğin mâ-hüve’l-vâki‘ alâ-vukū‘ihî gıbbe’t-taleb ketb ü sebt olundu. Tahrîren fi’l-yevmi’t-tâsi‘ min-şehri Rebî‘ülâhir li-sene erba‘a ve sittin ve elf. Şuhûdü’l-hâl: Fahrü erbâbi’t-tahrîr ve’l-kalem Ahmed Efendi b. Mehmed, mefharü’l-a‘yân Mehmed Ağa emîn-i çavuşân-ı dergâh-ı âlî, Abdüllatif Çelebi, Ali b. Muslı, Mehmed Beşe b. Ahmed er-râcil.