Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 195 Hüküm no: 248 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih Çelebi’nin evini Ali Ağa b. Abdullah’a sattığı Mahmiye-i İstanbul’da Timurtaş Mahallesi’nde sâkin Salih Çelebi b. Şeyhi Efendi meclis-i şer‘-i hatîr-i lâzımü’t-tevkīrde mahmiye-i mezbûrede hâlâ beytülmâl-i hâssa emîni olan işbu sâhibü’l-kitâb fahrü’l-emâsil ve’l-akrân Ali Ağa b. Abdullah tarafından ikrâr-ı âti’l-beyânı tasdîka vekîl olup Mehmed Beşe b. İbrahim ve İbrahim Beşe b. Ahmed nâm kimesneler şehâdetleri ile vekâleti sâbite Mustafa Efendi b. Mehmed mahzarında bi’t-tav‘i’s-sâf ikrâr u i‘tirâf edip mahalle-i mezbûrede vâki‘ iki tarafdan Koyunzâde Mehmed Efendi mülkü ve bir tarafdan mahalle-i mezbûre İmâmı Mehmed Efendi mülkü ve bir tarafdan tarîk-i âm ile mahdûd bir bâb tahtânî ve iki bâb fevkānî büyûtu ve kenîf ve ahuru müştemil mülk menzilimi müvekkil-i mezbûr Ali Ağa’ya tarafeynden îcâb ve kabûlü hâvî bey‘-i kat‘î ile râyic fi’l-vakt otuz beş bin akçeye bey‘ ve teslîm edip ol dahi iştirâ ve kabûl ve tesellüm eyledikden sonra semen-i mezbûr otuz beş bin akçeyi müşteri-i mezbûr Ali Ağa yedinden bi’t-tamam ve’l-kemâl ahz u kabz eyledim ba‘de’l-yevm menzil-i mezbûr merkūm Ali Ağa’nın mülk-i mahzı ve hakk-ı sırfı olup benim medhal [ve] alâkam kalmamışdır, keyfe mâ yeşâ’ ve hasbe-mâ yürîd mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb ü sebt olundu. Fi’l-yevmi’r-râbi‘ aşer min-şehri Rebî‘ülâhir li-sene erba‘a ve sittin ve elf. Şuhûdü’l-hâl: Umdetü’l-a‘yân Abdüllatif Efendi el-kâtib, Mustafa Çelebi b. Ahmed, Hüseyin Efendi b. Osman el-kādı, İbrahim Çavuş er-râcil, Süleyman Çelebi b. Ali Bey, Hüseyin b. Ya‘kub er-râcil, İbrahim b. Ahmed er-râcil, Murtaza Ağa b. Ali, Ali Çelebi b. İdris ve gayruhum mine’l-huzzâr.