Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 195 Hüküm no: 249 Orijinal metin no: [38a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Çelebi ile Ahmed Çelebi’nin Ahmed Efendi’den aldıkları borca Murad Çelebi’nin kefil olduğu Husûs-ı âti’l-beyânın mahallinde ketb ü tahrîr olunması’çün bi’t-taleb irsâl olan mevlânâ Ali Efendi zeyl-i kitâbda isimleri mastûr olan Müslimîn ile mahmiye-i İstanbul’da Rammâl çeşmesi kurbünde Bezzâz-ı cedîd [Mahallesi’nde] sâkin işbu bâ‘isü’l-kitâb fahrü erbâbi’t-tahrîr ve’l-kalem Ahmed Efendi b. Mehmed’in menziline varıp akd-i meclis-i şer‘-i şerîf olundukda vilâyet-i Rumeli’nde kasaba-i Tekfurdağı sükkânından Hasan Çelebi b. Ali ve Ahmed Çelebi b. Mehmed nâm kimesneler meclis-i mezbûrda merkūm Ahmed Efendi mahzarında herbiri ikrâr-ı tâm ve takrîr-i kelâm edip târîh-i kitâb günü mezbûr Ahmed Efendi yedinden herbirimiz otuz dokuz bin fıddî râyic fi’l-vakt akçe iktirâz ve kabz eyleyip cem‘an mezbûr Ahmed Efendi’ye yetmiş sekiz bin akçe edâsı lâzım deynimiz vardır dediklerinde gıbbe’t-tasdîkı’ş-şer‘î mukırrân-ı mezbûrân Hasan Çelebi ve Ahmed Çelebi’nin hîn-i mutâlebede nefislerini meclis-i şer‘a ihzârlarına mahmiye-i mezbûrede Üsküblü Mahallesi’nde sâkin Murad Çelebi b. Osman nâm kimesne emr ve kabûlü hâvî kefâlet ile kefîl olmağın vâki‘ hâli mevlânâ-yı mezbûr mahallinde tahrîr ba‘dehû cânib-i şer‘den ma‘an irsâl olunan Ali Beşe ve Mehmed Çelebi ile gelip alâ-vukū‘ihî meclis-i şer‘de herbiri inhâ ve takrîr etmeğin mâ-vaka‘a bi’t-taleb ketb olundu. Hurrire fi’l-yevmi’r-râbi‘ aşer min-şehri Rebî‘ülâhir li-sene erba‘a ve sittin ve elf. Şuhûdü’l-hâl: Mustafa Ağa b. ( ) çaşnigîr, Mehmed Ağa kethüdâ-yı habbâzan, Mehmed Ağa b. ( ) ser-oda, Kenan b. Abdullah, Rıdvan b. Abdullah, Pîrî b. Hüseyin.