Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 196 Hüküm no: 250 Orijinal metin no: [38a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe b. Abdullah’ın kölesini azat ettiği Cerâ mâ-fîhi mine’l-i‘tâk inde’l-fakīr ile’l-meliki’l-Hallâk es-Seyyid Hüseyin el-müvellâ hilâfeten bi-mahkemeti Ahi Çelebi bi-medîneti Kostantıniyye el-mahmiyye -ufiye anhu- Mahmiye-i İstanbul’da Gül Câmi‘i Mahallesi’nde sâkin Mustafa Beşe b. Abdullah nâm kimesne meclis-i şer‘-i hatîr-i lâzımü’t-tevkīrde kendüye rıkkını mu‘terif olan orta boylu, açık kaşlı, kara gözlü Gürciyyü’l-asl işbu bâ‘isü’l-kitâb Ali b. Abdullah nâm abd-i memlûkü muvâcehesinde ikrâr u i‘tirâf edip evsâf-ı mezkûr ile mevsûf olan mezbûr Ali’yi hasbeten lillâhi te‘âlâ ve taleben li-merzâtihî “Yevme yestazıllü’l-mer’u tahte zılli sadakātihî ve amelen bi-mâ-kāle’n-nebiyyü’l-muhtâr: Men a‘taka rakabeten mümineten a‘taka’llâhu te‘âlâ bi-külli udvin minhâ udven minhu mine’n-nâr” âzâd ve i‘tâk eyledim, ba‘de’l-yevm sâir ahrâr-ı asliyyîn gibi hür olup üzerinde hakk-ı velâdan gayrı hakkım kalmadı dedikde mâ-vaka‘a bi’t-taleb ketb ü sebt olundu. Fi’l-yevmi’l-âşir min-Cemâziyelûlâ li-sene selâse [erba‘a] ve sittin ve elf. Şuhûdü’l-hâl: es-Seyyid Ahmed Çelebi b. es-Seyyid Hasan, el-Hâc Mehmed b. el-Hâc Hüseyin, Şa‘ban Beşe b. el-Hâc Ali, Hasan Beşe b. Abdullah, Siyavuş b. Abdullah, Mustafa b. Ömer, Mehmed Çelebi b. Ali ve gayruhum mine’l-huzzâr.