Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 196 Hüküm no: 251 Orijinal metin no: [38a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâmile bt. Abdullah’ın cariyesini vasiyet ile azat ettiği Mahmiye-i İstanbul’da Arabacılar kurbünde sâkine Kâmile bt. Abdullah nâm hatun mahfil-i şer‘-i şerîfde takrîr-i kelâm ve bast-ı merâm kılıp hâzıratü bi’l-meclis olup bana rıkkını mu‘terife olan açık kaşlı, elâ gözlü, orta boylu, Rusiyyetü’l-asl hâfızatü hâze’l-kitâb Rahime bt. Abdullah nâm câriye-i memlûkemi vefâtımdan kırk gün mukaddem âzâd olmak üzere tedbîr-i mukayyed ile tedbîr eyledim bi-emri’llâhi te‘âlâ kazâ-i nahb eyleyip müddet-i mezbûre bulundukda mevsûfe-i mezbûre kavl-i muhtâr üzere cemî‘-i mâlımdan sâir harâir-i asliyyât gibi hürre olsun dedikde mâ-vaka‘a bi’t-taleb ketb ü sebt olundu. Fi’l-yevmi’r-râbi‘ aşer min-şehri Rebî‘ülâhir li-sene erba‘a ve sittin ve elf. Şuhûdü’l-hâl: Mahmud Efendi b. Mehmed, el-Hâc Mahmud b. el-Hâc Ahmed, Bakkāl Receb Beşe b. Ahmed, Mustafa Çavuş b. Abdullah ve gayruhum mine’l-huzzâr.