Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 197 Hüküm no: 252 Orijinal metin no: [38b-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âişe bt. el-Hâc Şa‘bân’ın kocası Ali Beşe ile anlaşarak boşandığı (muhâla‘a) Medîne-i mahmiye-i Galata tevâbi‘inden Tophane kasabası mahallâtından Sakabaşı Mahallesi’nde sâkine Âişe bt. el-Hâc Şa‘bân nâm hatun meclis-i şer‘-i şerîfe hâzıra olup râfi‘u’l-kitâb Ali Beşe b. Mustafa nâm zevci ile muhâla‘a etti. Zevc-i mezbûr dahi nikâhında ma‘kūdün-aleyh râyicü’l-vakt üç bin beş yüz akçe mehr-i müecceli, nafaka-i iddeti ve meûnet-i süknâsı mukābelesinde zevce-i mezbûresi ile hul‘ eyledi. Mezbûre Âişe bu sûretle akd-i cedîd ve mehr-i müste’nif olmadan zevc-i mezkûra helâl olmayacak şekilde bâyinen ayrılmış oldu. Sonra hukūk-ı zevciyyete müte‘allik cemî‘ de‘âvîden her biri diğerinin zimmetini ibrâ-yı âmm-ı kātı‘un li’n-nizâ‘ ile ibrâ etti. Cerâ zâlike ve hurrire fi’l-yevmi’s-sâdis aşere min-Rebî‘ilâhir li-sene erba‘a ve sittin ve elf. Şuhûdü’l-hâl: İbrahim Beşe b. Ramazan el-mübâşir, Mustafa Çelebi b. Hasan, el-Hâc Mehmed Emin b. Hüseyin, Mehmed b. Mustafa, Mehmed Beşe b. Receb, İshak Beşe b. el-Hâc Veli, Hasan Beşe er-râcil, Mustafa Beşe b. Abdullah, Mehmed Beşe b. Receb ve gayruhum