Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 197 Hüküm no: 253 Orijinal metin no: [38b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Menteş v. Salamon’un vefât eden Ömer Çelebi’nin vârislerine olan borcu ödemesi Mahrûse-i Galata kazâsına tâbi‘ kasaba-i Kasımpaşa’da Çatmamescid Mahallesi’nde sâkin iken bundan akdem müteveffâ olan Ömer Çelebi b. Mehmed’in sulbî sagīr oğlu Abdi ve sagīre kızları Fâtıma ve Âişe’nin tesviye-i umûri’çün kıbel-i şer‘-i mergūbdan vasiyy-i mansûbları olan Ahmed b. Derviş tarafından meblağ-ı âti’z-zikri taleb ve da‘vâ, ahz u kabz ve îsâle mütevakkıf olduğu umûrun cümlesine vekîl-i şer‘î olan bâ‘isü’l-kitâb el-Hâc Mehmed b. Mustafa nâm kimesne mahfil-i şer‘-i şerîfde Yahûd tâifesinden olup Mesine cemâ‘atinden olan Menteş v. Salamon muvâcehesinde bi’l-vekâle üzerine da‘vâ edip mezbûr Menteş zimmetinde sıgār-ı mezbûrînin mâl-ı mevrûslarından bin iki yüz altmış akçe hakları olup vekâlet-i mahkiyem hasebiyle taleb ederim, suâl olunsun dedikde gıbbe’l-istintak mezbûr Menteş cevâbında fi’l-hakīka sıgār-ı mezbûrînin mevrûsları olan mâldan zimmetimde lâzımü’l-edâ bin iki yüz altmış akçe deynim vardır deyü bi-tav‘ihi ikrâr etmeğin edâsına tenbîh-birle mâ-vaka‘a ketb olundu. Fi’l-yevmi’s-sâdis aşer min-şehri Rebî‘ülâhir li-sene erba‘a ve sittin ve elf. Şuhûdü’l-hâl: Pîrî Beşe b. Hüseyin, İbrahim Çelebi b. Davud, Rıdvan Beşe b. Abdullah, Halil b. Lütfullah, Mehmed Beşe b. Abdullah ve gayruhum.