Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 198 Hüküm no: 255 Orijinal metin no: [38b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Bey b. Abdullah’ın boşanmış olduğu hanımı Râbia’ya oğlu Abdullah’ı emzirmek üzere cariyesi Gülistan’ı verdiği Sipâh tâifesinden Ahmed Bey b. Abdullah mahfil-i şer‘de zevce-i mutallakası olan Râbia bt. Abdullah nâm hatun mahzarında ikrâr ve takrîr-i kelâm edip mezbûre Râbia’yı kendüden tevellüd eden sulbî sagīr oğlum Mehmed’i târîh-i kitâbdan bir sene tamamına değin yevmî beşer akçe nafaka ile irzâ‘ ve imsâk etmek için seksen guruşa istîcâr edip ol dahi minvâl-i muharrer üzere nefsini îcâr eyledikden sonra zikr olunan ücreti mukābelesinde hâlâ hizmetinde olan seksen guruş kıymetli Gülistan nâm câriyemi ber-vech-i peşin def‘ ve teslîm edip ol dahi kabz ve tesellüm eylemişdir, suâl olunup ikrârı tahrîr olunmak murâdımdır dedikde gıbbe’s-suâl mezbûre Râbia vech-i muharrer üzere nefsini îcâr edip ve mezbûre Gülistan’ı ücreti mukābelesinde ber-vech-i peşin kabz ve tesellüm eylediğini ikrâr etmeğin mâ-vaka‘a bi’t-taleb ketb ü sebt olundu. Fi’l-yevmi’s-sânî aşer min-şehri Rebî‘ülâhir li-sene erba‘a ve sittin ve elf. Şuhûdü’l-hâl: İbrahim Çelebi b. Davud, Rıdvan Beşe b. Abdullah, Pîrî Beşe b. Hüseyin, Muharrem Beşe b. Abdullah ve gayruhum mine’l-huzzâr.