Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 199 Hüküm no: 257 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saltana bt. Şabatay’ın evinin tasarruf hakkını sattığı Mahmiye-i İstanbul’da Sisilya cemâ‘atinden Saltana bt. Şabatay nâm Yahûdiye meclis-i şer‘-i hatîr-i lâzımü’t-tevkīrde işbu râfi‘ayü’l-kitâb Yako v. Nakib ve Togba v. David nâm Yahûdiler muvâcehelerinde ikrâr-ı tâm ve takrîr-i kelâm edip merhûm ve mağfûrun-leh Üsküdârî Şeyh Mahmud Efendi’nin -kuddise sırruhü’l-azîz- evkāfından olup mahmiye-i merkūmede Unkapanı kurbünde vâki‘ icâre-i mu‘accele ve yevmî on beş akçe ücret-i müeccele ile tasarrufumda olan bir tarafı mîrî tüfenkhâne ve bir tarafı bostancıbaşı menzili ve bir tarafı sâhil-i bahr ve bir tarafı tarîk-i âm ile mahdûd olan menzilden nısf-ı şâyi‘inin hakk-ı tasarrufunu vakf-ı mezbûr mütevellîsi ma‘rifetiyle merkūmân Yako ve Togba’ya kırk sekiz bin fıddî-i Osmânî akçe bedel mukābelesinde tefvîz edip onlar dahi minvâl-i muharrer üzere ale’l-iştirâki’s-seviyy tefevvüz ve kabûl eylediklerinden sonra bedel-i tefvîz olan meblağ-ı merkūm kırk sekiz bin akçeyi târîh-i kitâbdan yüz beş gün tamamına değin te’cîl eyledim, ba‘de’l-yevm menzil-i mezbûrun zikrolunan nısf-ı şâyi‘inde benim alâka ve medhalim kalmadı dedikde mukırra-i mezbûre Saltana’nın ikrâr-ı meşrûhun merkūmân Yako ve Togba vicâhen tasdîk ve şifâhen tahkīk etmeğin mâ-hüve’l-vâki‘ gıbbe’t-taleb ketb ü sebt olundu. Fi’l-yevmi’l-hâmis min-şehri Rebî‘ülâhir li-sene erba‘a ve sittin ve elf. Şuhûdü’l-hâl: İbrahim Çelebi b. Davud, Pîrî b. Hüseyin, Mehmed b. Hüseyin, Rıdvan b. Abdullah, Yako v. Nesim, Avraham v. Yasef ve gayruhum.