Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 200 Hüküm no: 258 Orijinal metin no: [39a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Dimitri’nin borçlu olduğu Süleyman’ın vârislerine sulh bedeli olan parayı ödemesi Mahmiye-i İstanbul’da Timurtaş Mahallesi sükkânından olup bundan akdem Bağdâd fethinde müteveffâ olan Süleyman b. Ahmed nâm kimesnenin verâseti zevce-i metrûkesi İsmihan bt. Şa‘ban ve sulbiye kebîre kızları Ümmühan ve Neslihan nâm hatunlara münhasıra olduğu şer‘an sâbit ve mütehakkık oldukdan sonra mezbûrât İsmihan ve Ümmühan ve Neslihan mahfil-i şer‘-i şerîfde zimmî tâifesinden Yorgi [v.] Dimitri nâm zimmînin sulbî oğlu ve sulh-i âti’z-zikre vekîl-i şer‘îsi olup nehc-i mu‘teber-i mer‘î üzere vekâleti sâbite olan Yanaki nâm zimmî mahzarında herbiri ikrâr ve takrîr-i kelâm edip mevrûsumuz müteveffâ-i mezbûrun merkūm Yorgi zimmetinde cihet-i karz-ı şer‘îden beş yüz riyâlî guruş hakkı olup kable’l-istîfâ müteveffâ olmağile meblağ-ı mezbûr beş yüz guruş bi-hasebi’l-irsi’ş-şer‘î bize intikāl etmekle mezbûr Yorgi’den verâset-i mahkiyem hasebiyle meblağ-ı mezbûr beş yüz guruşu taleb ve da‘vâ eylediğimizde ancak kırk sekiz guruş ikrâr edip mâ‘adâ dört yüz elli iki adedi inkâr eyledikde i‘tirâfı olan kırk sekiz guruşun edâsı’çün cânib-i şer‘den tenbîh olunup inkâr eylediği dört yüz elli iki guruş hakkımız için tenbîh taleb olundukda istimhâl ve imhâl olunmuş idi. Hâlâ ityân-ı beyyine talebinde beynimize muslihûn tavassut edip an-inkâr yüz iki guruş üzerine inşâ-i akd-i sulh eylediklerinde biz dahi sulh ve âhar sulh-i mezbûru kabûl ve bedel-i sulh olan meblağ-ı mezbûr yüz iki guruşu vekîl-i mezbûr yedinden herbirimiz hisse-i şer‘iyyelerimizi bi’t-tamam ahz u kabz edip asîl-i mezbûrdan mukaddemâ ahz eylediğimiz kırk sekiz guruş ile cem‘an yüz elli guruş hakkımızı istîfâ edip mâ‘adâ üç yüz elli guruşdan mezbûr Yorgi zimmînin zimmetini ibrâ ve ıskāt eyledik, ba‘de’l-yevm bizden bi’z-zât veyâ vekîllerimizden bi’l-vekâle mazmûn-ı kitâba muhâlif da‘vâ sudûr ederse lede’l-hükkâmi’l-kirâm istimâ‘ ve ısgā olunmasın dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’s-sâbi‘ aşer min-Rebî‘ülâhir li-sene erba‘a ve sittin ve elf. Şuhûdü’l-hâl: Mehmed Efendi b. Ahmed el-kādı, Mehmed Beşe b. Mustafa, el-Hâc Şa‘ban b. Ebîbekir, Mehmed Beşe b. Ali, el-Hâc Hüseyin b. Şa‘ban.