Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 200 Hüküm no: 259 Orijinal metin no: [39a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi’nin evini İsmail Efendi’ye sattığı Mahmiye-i İstanbul’da Akşemseddin Mahallesi sâkinlerinden Mehmed Efendi b. Süleyman meclis-i şer‘-i hatîr-i lâzımü’t-tevkīrde işbu râfi‘u’l-kitâb İsmail Efendi b. Ca‘fer mahzarında ikrâr ve takrîr-i kelâm edip mahalle-i mezbûrede vâki‘ bir tarafdan ba‘zan Âişe Hatun ve ba‘zan Hadice Hatun mülkleri ve bir tarafdan Zebûn Mehmed Çelebi mülkü ve bir tarafdan tarîk-i âm ile mahdûd üç bâb tahtânî odaları ve cüneyne-i zât-ı eşcâr-ı müsmire ve gayr-ı müsmireyi ve bi’r-i mâ’ ve kenîfi müştemil olan mülk menzilimi cümle tevâbi‘ ve levâhıkıyla bi-tarîkı’l-istiğlâl iki yüz elli riyâlî guruşa merkūm İsmail Efendi’ye mukaddemâ bey‘ ve teslîm edip ol dahi kendi malıyla iştirâ ve tesellüm eyledikden sonra zikrolunan iki yüz elli riyâlî guruşu yedinden ahz u kabz edip meblağ-ı mezbûr zimmetime edâsı lâzım deynim olmuş idi. Hâlâ menzil-i mezbûru mezkûr İsmail Efendi’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile üç yüz kıt‘a riyâlî guruşa bey‘ ve temlîk edip ol dahi minvâl-i muharrer üzere iştirâ ve temellük eyledikden sonra semen-i mezbûr üç yüz guruşun iki yüz elli guruşunu zikrolunan iki yüz elli guruş deynime takās edip bâkī kalan elli guruşu yedinden bi’t-tamam kabz eyledim, ba‘de’l-yevm menzil-i mezbûrda benim alâka ve medhalim kalmayıp mûmâ-ileyh İsmail Efendi’nin mülk-i müşterâsı olmuşdur, keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fi’l-yevmi’l-ışrîn min-şehri Rebî‘ülâhir li-sene erba‘a ve sittin ve elf. Şuhûdü’l-hâl: Abdi Efendi el-imâm, Mahmud Halîfe el-müezzin, Şa‘ban Efendi b. Ömer, Hüseyin Bey er-râcil, İbrahim b. Davud, Pîrî b. Hüseyin, Ahmed b. Abdülcebbar, Mehmed Çelebi b. Hüseyin, el-Hâc Şa‘ban b. Mehmed.