Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 201 Hüküm no: 260 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikol v. Manol ile Dimitri v. Todori arasındaki ev davasına sulh bedeli para karşılığında son verildiği Vilâyet-i Rumeli’nde İshakçı kasabasına tâbi‘ Tuzpazarı nâm karye ahâlîsinden olup sulh-i âti’z-zikrde bedel-i sulhü kabz ve îsâle ve li-ebeveyn karındaşı Nikol v. Manol nâm zimmî tarafından Arslan v. Todori ve Dudu v. Kosta nâm zimmîler şehâdetleri ile sâbitü’l-vekâle vekîl ve kendi tarafından asîl olan Sava nâm zimmî mahfil-i şer‘-i şerîfde kasab tâifesinden işbu sâhibü’r-rakīm Dimitri v. Todori muvâcehesinde asâleten ve vekâleten ikrâr-ı tâm ve takrîr-i kelâm [edip] mahmiye-i İstanbul’da Ali Paşa-yı atîk Mahallesi’nde vâki‘ bir tarafdan Kuyumcu Yamandi v. (...) nâm zimmî mülkü ve bir tarafdan Arab odaları ve bir tarafdan Polhar nâm zimmî mülkü ve bir tarafdan tarîk-i âm ile mahdûd olup bir bâb fevkānî beyti ve bi’r-i mâ’ ve kenîf ve zât-ı eşcâr-ı müsmire ve gayr-ı müsmire cüneyneyi hâvî olup mülkiyet üzere mezbûr vâzı‘u’l-yed olup taht-ı yedimde olan menzil müvekkil-i mezbûr ile benim mülk-i mevrûsumdur, sen fuzûlî taraf [zabt] edersin deyü mezbûr Dimitri’den taleb ve da‘vâ eylediğinde beynimizde münâza‘ât-ı kesîre ve muhâsamât-ı ekîde vâki‘ olmuş idi. El-hâletü hâzihî beynimizde muslihûn <> tavassut [edip] yirmi altı bin akçe üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr yirmi altı bin akçeyi mezbûr Dimitri yedinden bi’t-tamam ve’l-kemâl alıp ahz u kabz edip menzil-i mezbûra müte‘allık da‘vâmız kalmadı, ba‘de’l-yevm mazmûn-ı hüccete muhâlif asâleten veyâ vekâleten da‘vâ sudûr ederse lede’l-hükkâmi’l-kirâm mesmû‘a ve makbûle olmaz dedikde gıbbe’t-tasdîkı’l-mu‘teber ketb olundu. Fi’r-râbi‘ ve’l-ışrîn min-şehri Rebî‘ülâhir li-sene erba‘a ve sittin ve elf. Şuhûdü’l-hâl: Kapıcı İbrahim b. Abdullah, Mehmed Beşe b. Abdullah, Mehmed b. Hüseyin, Ahmed Çelebi [b.] Attâr Abdullah, İbrahim Çelebi b. Davud er-ressâm, Hüseyin b. Mahmud, Mehmed [b.] Mustafa, Pîrî b. Hüseyin ve gayruhum.