Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 202 Hüküm no: 261 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Mihalaki’nin Ellinci bölük için vakfedilmiş olan paradan aldığı borca karşılık bıraktığı rehinlerin satılarak borcun ödenmesi Cezîre-i Midilli ahâlîsinden olup Mısırlı dâmâdı demekle ma‘rûf olan Yanaki v. Mihalaki nâm zimmî mahfil-i kazâda işbu bâ‘iseyi’l-kitâb Portukal cemâ‘atinden Berbos kazzâz demekle meşhûr Şabatay v. Paroh nâm Yahûdi ve Yorgaki v. Savasto nâm zimmî muvâcehelerinde takrîr-i kelâm ve tebyîn-i merâm edip Ellinci ağa bölüğü odasının nukūd-ı mevkūfesinden mütevellîsi ve odabaşısı olan işbu hâzır bi’l-meclis Ahmed Beşe yediyle bin kıt‘a riyâlî guruş istikrâz ve tesellüm edip mukābelesinde bir mücevher kemer kostak ve bir çift mücevher bilezik ve bir ön mücevher kuşak rehin vaz‘ edip ol dahi irtihân ve kabûl ve kabz ve tesellüm eyledi. Sene-i âtiye Muharremi’l-harâmı gāyetinde rehân-ı mezbûreyi merkūm Ahmed Beşe’den alıp semen-i misilleri ile bey‘ ve kabz-ı semene ve semenlerinden zikr olunan bin guruş deynimi cânib-i vakıf için merkūm Ahmed Beşe’ye edâya bâkī ne kalırsa bana îsâle merkūmân Şabatay ve Yorgaki’nin herbiri azil ve in‘izâlden masûn vekâlet-i devriye ile tarafımdan vekîl ve menâbıma nâib nasb ve ta‘yîn eyledim dedikde merkūmân dahi vekâlet-i mezkûreyi kabûl ve merâsimini edâya herbiri müte‘ahhid olmağın mâ-hüve’l-vâki‘ gıbbe’t-taleb ketb ü sebt olundu. Fi’l-yevmi’l-ışrîn min-şehri Rebî‘ülâhir li-sene erba‘a ve sittin ve elf. Şuhûdü’l-hâl: Ali Efendi b. Mehmed, Yusuf Bey el-cündî, Hasan Çelebi b. Mustafa, İbrahim Çelebi b. Davud ve gayruhum mine’l-huzzâr.