Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 202 Hüküm no: 262 Orijinal metin no: [39b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. İnilya’nın şirehanesini sattığı Vilâyet-i Anadolu’da Ürgüb kazâsına tâbi‘ Sinason nâm karye ahâlîsinden Yani v. Enbilye nâm zimmî meclis-i şer‘-i şerîf-i lâzımü’t-teşrîfde karye-i mezbûre sâkinlerinden işbu bâ‘isü’r-rakīm Aleksi v. Mavror nâm zimmî muvâcehesinde ikrâr-ı tâm ve takrîr-i kelâm edip karye-i mezbûrede vâki‘ silk-i mülkümde muntazam olup bir tarafdan Közme nâm zimmî mülkü ve bir tarafdan Anastos ve bir tarafdan Dimitri v. ( ) zimmîler mülkleri ve bir tarafı tarîk-i âm ile mahdûd olan mülk şirehânemi tarafeynden îcâb ve kabûlü hâvî bey‘-i bâtt-ı sahîh-i şer‘î <> ve safka-i vâhide ile bin altı yüz nakd râyic fi’l-vakt fıddî akçe mukābelesinde mezbûr Aleksi’ye bey‘ edip ol dahi iştirâ ve kabûl eyledikden sonra semen-i mezbûr bin altı yüz akçeyi yedinden tamamen ahz u kabz edip bey‘-i mezbûru mahallinde ahza taslît eyledim, keyfe mâ yeşâ’ mutasarrıf olsun dedikde bi’t-taleb ketb olundu. Fi’l-yevmi’s-sâlis ve’l-ışrîn şehri Rebî‘u’l-âhir li-sene erba‘a ve sittin ve elf. Şuhûdü’l-hâl: İbrahim Çelebi b. Davud, Mehmed Çelebi b. Hüseyin, el-Hâc Şa‘ban b. Mehmed, Rıdvan b. Abdullah.