Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 203 Hüküm no: 263 Orijinal metin no: [39b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Enbilye’nin ev, bağ ve samanlığını sattığı Vilâyet-i Anadolu’da Ürgüb kazâsına tâbi‘ Sinason nâm karye sâkinlerinden Yani v. Enbilye nâm zimmî meclis-i şer‘de işbu bâ‘isü’r-rakīm Anastos v. Oralkos nâm zimmî mahzarında ikrâr ve takrîr-i kelâm edip karye-i mezbûre sınırı dâhilinde vâki‘ bir tarafı karındaşım Payko nâm zimmî mülkü bir tarafı çay ve bir tarafı Közme nâm zimmî ahırı ve bir tarafı tarîk-i âm ile mahdûd olan üç bâb tahtânî odaları ve bir ahırı müştemil mülk menzilimi ve yine karye-i mezbûre sınırı dâhilinde vâki‘ bir tarafı mezbûr Payko bağı bir tarafı mezbûr Anastos bağı ve bir tarafı Master bağı ve bir tarafı Közme nâm zimmî bağı ile mahdûd olup bir şirehânemi müştemil bir kıt‘a mülk bağımı safka-i vâhide seksen esedî guruşa ve yine karye-i mezbûrede vâki‘ bir tarafı Tonos Toman nâm zimmî mülkü ve bir tarafı Hızır Beşe samanlığına ve bir tarafı tarîk-i âm ile mahdûd olan mülk samanlığımı on esedî guruş ki cem‘an doksan [40a] esedî guruşa mezbûr Anastos’a bey‘-i bâtt-ı sahîh-i şer‘î ile tarafeynden îcâb ve kabûlü hâvî bey‘ edip ol dahi iştirâ ve kabûl eyledikden sonra semen-i mezbûr doksan esedî guruşu mezbûr Anastos yedinden bi’t-tamam ve’l-kemâl ahz u kabz edip zikrolunan odaları ve bağı ve samanlığı mahallinde kabz u tasdîka mezbûr Anastos’u taslît eyledim, ba‘de’l-yevm mülk-i müşterâsı olup hasbe-mâ yürîd mutasarrıf olsun dedikde gıbbe’t-tasdîkı’ş-şer‘î mâ-vaka‘a ketb olundu. Fi’l-yevmi’s-sâmin ve’l-ışrîn şehri Rebî‘ülâhir li-sene erba‘a ve sittin ve elf. Şuhûdü’l-hâl: Ali Beşe b. ( ) çukadâr, İbrahim Çelebi b. Davud, el-Hâc Şa‘ban b. Mehmed, Kirkor v. Esed, Yani v. Nikokos, Kaço v. İstado v. Sava, Vasil v. Sava, Todori v. Gaytan.