Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 204 Hüküm no: 265 Orijinal metin no: [40a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Hasan b. Bayram’ın Ali Beşe’deki alacağı konusunda sulh bedeli karşılığında anlaşma sağlandığı Mahmiye-i İstanbul’da Salih Paşa Mahallesi’nde sâkin el-Hâc Hasan b. Bayram mahfil-i kazâda işbu râfi‘u’l-kitâb <> Ali Beşe b. Mehmed nâm kimesne mahzarında ikrâr-ı tâm ve takrîr-i kelâm edip mezbûr <> Ali Beşe zimmetinde cihet-i deyn-i şer‘îden bin elli üç kıt‘a riyâlî guruş hakkım olup meblağ-ı mezbûru merkūm <> Ali Beşe’den da‘vâ ve taleb eylediğimde beynimizde münâza‘ât-ı kesîre ve muhâsamât-ı şedîde vâkı‘a olmuş idi. El-hâletü hâzihî beynimizde muslihûn tavassut edip yirmi bin nakd râyic fi’l-vakt fıddî-i Osmânî akçe üzerine beynimizde inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı merkūm yirmi bin akçeyi mezbûr Halil [Ali] Beşe yedinden bi’t-tamam ve’l-kemâl ahz u kabz edip husûs-ı mezbûra müte‘allık da‘vâdan mezbûr <> Ali Beşe’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim, vechen mine’l-vücûh mezbûr <> Ali Beşe ile da‘vâ ve nizâ‘ım kalmadı, ba‘de’l-yevm bir tarîk ile mazmûn-ı kitâba muhâlif asâleten ve vekâleten benden da‘vâ sudûr ederse lede’l-hükkâmi’l-kirâm istimâ‘ olunmaya dedikde gıbbe’t-tasdîk ve’t-taleb mâ-vaka‘a ketb ü sebt olundu. Fi’s-sâdis ve’l-ışrîn min-şehri Rebî‘ülâhir li-sene erba‘a ve sittin ve elf. Şuhûdü’l-hâl: Himmet Beşe b. Mehmed, Ahmed Çelebi b. Ömer, Şa‘ban Ağa serdâr, Mehmed b. Bayram, Mustafa Beşe b. Hasan, Ali Beşe b. Mehmed ve gayruhum mine’l-huzzâr.