Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 205 Hüküm no: 266 Orijinal metin no: [40b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emrullah Bey’in Kıbrıs’ta bulunan Halil Efendi’deki alacağını tahsil eden Ali Çavuş’a paranın bir kısmını yol masrafı olarak verdiği Mahmiye-i İstanbul’da Kızıltaş Mahallesi’nde sâkin Emrullah Bey b. Nurullah mahfil-i kazâda dergâh-ı âlî çavuşlarından olup mahmiye-i mezbûrede Küçükpazar’da sâkin olan işbu bâ‘isü’l-kitâb Ali Çavuş b. Hasan mahzarında ikrâr-ı tâm ve takrîr-i kelâm edip cezîre-i Kıbrıs’da vâki‘ medîne-i Lefkoşe’de sâkin Halil Efendi b. Hasan Efendi zimmetinde cihet-i karz-ı şer‘îden bin yirmi üç buçuk riyâlî guruş hakkım olmağile meblağ-ı mezbûru merkūm Halil Efendi’den taleb ve tahsîl ve ahz u kabz ve bana îsâl etmek için mezbûr Ali Çavuş’u mübâşir ta‘yîn edip cezîre-i mezbûreye irsâl eylemiş idim. Mezbûr Ali Çavuş medîne-i mezbûreye varıp meblağ-ı merkūmu mezbûr Halil Efendi’den bi’t-tamam tahsîl ve ahz u kabz etmeğin meblağ-ı mezbûrun yedi yüz elli riyâli merkūm Ali Çavuş yedinden ahz u kabz edip bâkī kalan iki yüz yetmiş üç buçuk guruş ikimizin rızâsıyla merkūm Ali Çavuş’un cezîre-i mezbûreye varıp gelince olan ecr-i misline takās eyledim, meblağ-ı mezbûr bin yirmi üç buçuk riyâlî guruşdan mezkûr Ali Çavuş’da bir akçe hakkım bâkī kalmadı, merkūm Ali Çavuş ile vechen mine’l-vücûh da‘vâ ve nizâ‘ım dahi yokdur dedikde gıbbe’t-tasdîk ve’t-taleb mâ-vaka‘a ketb olundu. Fi’s-sâdis ve’l-ışrîn min-şehri Rebî‘ülâhir li-sene erba‘a ve sittin ve elf. Şuhûdü’l-hâl: Eş-şeyh İsa Efendi b. Ömer, Abdi Ağa b. Yusuf, el-Hâc Sunullah b. Ali, Mustafa Bey b. Sadi, el-Hâc Abdurrahman b. Hasan, Ahmed Beşe b. Receb, Hüseyin b. Hasan, Hüseyin Beşe b. Mehmed.