Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 207 Hüküm no: 271 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musahibbaba Ali Ağa’nın evini tamirini yapmak şartıyla kiraladığı Mahmiye-i İstanbul’da İshak Paşa Mahallesi’nde sâkin umdetü’l-havâs ve’l-mukarrebîn işâret-i ma‘hûdesi nutuk makāmına kāim olan bî-zebân musâhib Baba Ali Ağa b. Abdülmuîn’in mahmiye-i mezbûrede Hobyar Mahallesi’nde vâki‘ bir tarafdan Esterola bt. Sahak nâm Yahûdiye mülkü ve bir tarafdan Küçük Sisilya cemâ‘atine mahsûsa kenîse ve ba‘zan Klavite cemâ‘atine mahsûs kenîse ve iki tarafdan tarîk-i âm ile mahdûd tabaka-i ulyâsı kenîf ve bir sofa ve tabaka-i vustâsı iki bâb büyük oda ve bir matbah ve bir tatlı su kuyusu ve bir ...? ve iki bâb küçük oda ve altında iki hayat ve bir berber ve bir simidci dükkânı cem‘an beş bâb dükkânları ve bir at değirmenini müştemil olan menzile bi’t-taleb irsâl olunan mevlânâ Mehmed Efendi b. el-Hâc Mustafa zeyl-i kitâbda isimleri mastûr olan Müslimîn ile varıp akd-i meclis-i şer‘-i şerîf olundukda mûmâ-ileyh musâhib bî-zebân Baba Ali Ağa’nın ikrâr-ı âti’z-zikre sâbitü’l-vekâle vekîl-i şer‘îsi olan sinici? bî-zebân Ali nâm kimesne meclis-i mezbûrda işbu sâhibetü’s-sifr Kortaza bt. Malki nâm Yahûdiye muvâcehesinde bi’l-vekâle ikrâr ve takrîr-i kelâm edip menzil-i mezbûrun ana duvarından mâ‘adâ meremmât-ı lâzımesi mezbûre Kortaza kendi malıyla ta‘mîr eylemek üzere icâre-i tavîleyi tecvîz eden fukahâ-yı uli’l-elbâb kavli üzere tecdîd-i akde muhtâc olmaksızın her akd-i evvelin intihâsı akd-i sânînin ibtidâsı olmak üzere târîh-i kitâbdan üç sene mukaddem yevmî seksen akçeye menzil-i mezbûru müvekkil-i mûmâ-ileyh mezbûre Kortaza’ya icâre-i tavîle ile îcâr ve teslîm ol dahi istîcâr ve tesellüm eylemiş idi. Hâlâ menzil-i mezbûrun ana duvarından mâ‘adâ ta‘mîr ve meremmetine iki yüz yirmi guruş sarf olunup meblağ-ı mezbûru mezbûre Kortaza kendi mâlından sarf eylemek lâzım iken adem-i kudreti olmağın müvekkil-i mezbûr kendi mâlından sarf etmekle ücret-i mezbûreye yevmî beş akçe dahi zam olunup târîh-i kitâbdan yedi sene tamamına değin vech-i muharrer üzere tecdîd-i akde muhtâc olmayıp akd-i evvelin intihâsı akd-i sânînin ibtidâsı olmak üzere yevmî seksen beş akçeye menzil-i mezbûru vekâlet-i mahkiyem hasebiyle mezbûre Kortaza’ya îcâr ve teslîm ol dahi istîcâr ve tesellüm eyledi deyü işâret-i ma‘hûdesi ile işâret eylemeğin gıbbe’t-tasdîkı’ş-şer‘î sâlifü’z-zikr Küçük Sisilya cemâ‘atinden Paroh v. Danyel nâm Yahûdi müddet-i mezkûreye yevmen fe-yevmen müctemi‘ olan ücret-i ma‘lûmeye emr ve kabûlü hâviye kefâlet ile kefîl oldum dediğini mevlânâ-yı mezbûr mahallinde tahrîr ba‘dehû meclis-i şer‘a gelip alâ-vukū‘ihî ihbâr etmeğin mâ-vaka‘a bi’t-taleb ketb ü sebt olundu. Fi’l-yevmi’s-sâbi‘ ve’l-ışrîn min-şehri Rebî‘ülâhir li-sene erba‘a ve sittin ve elf. Şuhûdü’l-hâl: Mustafa Beşe b. Mehmed, Receb Beşe b. Abdullah, İbrahim b. Ali, Süleyman b. Said, İbrahim Beşe b. Davud ve gayruhum mine’l-huzzâr.