Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 209 Hüküm no: 274 Orijinal metin no: [41b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Ağa’nın evini Ahmed Ağa’ya sattığı Husûs-ı âti’z-zikrin mahallinde tahrîr olunması iltimâs olunmağın cânib-i şer‘-i şerîfden mevlânâ Abdulkādir Efendi b. Mehmed Efendi irsâl olunup ol dahi dârü’s-saltanatü’s-seniyye Kostantıniyyeti’l-mahmiyede Demirkapı civârında Dâye Hatun Mahallesi’nde sâkin mefharü’l-emâsil ve’l-eşbâh el-Hâc Hüseyin Ağa b. Bayram’ın menziline varıp zeyl-i kitâbda mastûretü’l-esâmî olan Müslimîn huzûrlarında akd-i meclis-i şer‘-i şerîf eyledikde mahmiye-i merkūmede Yenibağçe nâm mevzi‘de Karabaş Mahallesi’nde sâkin kıdvetü’l-emâsil ve’l-akrân Halil Ağa b. Ahmed meclis-i mezbûrda işbu kitâb-ı sıhhat-nisâbın sâhibi umdetü’l-emâcid ve’l-ekârim câmi‘ü’l-mehâmid ve’l-mekârim sabıkā bostancıbaşı olan Ahmed Ağa b. Mustafa mahzarında ikrâr-ı tâm ve takrîr-i kelâm edip silk-i mülk-i sahîhimde muntazam olup yine mahmiye-i mezbûrede Gül Câmi‘-i şerîfi Mahallesi’nde vâki‘ etrâf-ı selâsesi tarîk-i âm ve taraf-ı râbi‘i merhûm Yahya Paşa Sarayı’na müntehî olup muhavvata-i hâriciyesi üç bâb fevkānî odaları ve sofayı ve orta tabakada üç bâb odaları ve altında ahırı ve önünde arsa-yı hâliyeyi ve muhavvata-i dâhiliyesi üç bâb fevkānî odaları ve kilârı ve iki bâb tahtânî odaları ve matbahı ve bir fevkānî mâbeyn odasını ve iki kubbeli hamamı ve câmekânı ve altında mahzeni ve cüneyneyi müştemil olan menzilimi cümle tevâbi‘ ve levâhıkı ve kâffe-i menâfi‘ ve merâfıkı ile yedi bin kıt‘a riyâlî guruşa mûmâ-ileyh Ahmed Ağa’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip onlar dahi menzil-i mezbûru minvâl-i muharrer üzere iştirâ ve tesellüm eyledikden sonra semeni olan meblağ-ı mezbûr yedi bin kıt‘a riyâlî guruş -ki on dört kâmil kîse olur- bi’t-tamam ve’l-kemâl yedlerinden ahz u kabz eyledim, semen-i mezbûr yedi bin kıt‘a riyâlî guruşdan bir akçe ve bir habbe hakkım ve menzil-i mezbûrda alâka ve medhalim kalmadı ba‘de’l-yevm menzil-i mezkûr mûmâ-ileyh Ahmed Ağa’nın mülk-i müşterâsı olmuşdur, keyfe mâ yeşâ’ ve yehtâr mutasarrıf olsunlar dedikde mukırr-ı mezbûr Halil Ağa’nın vech-i muharrer üzere cârî ve sâdır olan ikrâr ve takrîrini el-mukarru lehü’l-mezbûr Ahmed Ağa vicâhen tasdîk ve şifâhen tahkīk etmeğin vâki‘ hâli mevlânâ-yı mezbûr mahallinde tahrîr ve ba‘dehû cânib-i şer‘den ma‘an irsâl olan Ali Çelebi b. Zülfikār ve Rıdvan b. Abdullah nâm kimesneler ile gelip meclis-i şer‘de alâ-vukū‘ihî herbiri inhâ ve takrîr etmeğin mâ-vaka‘a kaydolundu. Fî-gurreti Cumâdelûlâ li-sene erba‘a ve sittin ve elf. Şuhûdü’l-hâl: el-Hâc Hüseyin Ağa b. Bayram, Sinan Bey b. Kasım mumcu, Veli Bey b. Ali mumcu, Mehmed Bey b. Ali bostâncı oturağı, Zünnun Bey b. Süleyman bostâncı, Osman Usta b. Hasan, Mahmud Halîfe b. Mehmed el-kayyûm, İbrahim Ağa b. Yusuf, Aydın Bey bostâncı, Mustafa Bey b. Mehmed.