Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 212 Hüküm no: 280 Orijinal metin no: [42a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Handan Bey’in evini Mehmed Beşe’ye sattığı Vilâyet-i Anadolu’da hâlâ medîne-i Antalya’da sâkin olan Handan Bey b. Abdullah tarafından el-Hâc Mehmed b. Hüseyin nâm kimesnenin menzil-i âti’l-beyânı semen-i misli ile bey‘ ve teslîme vekîl olduğu hasm-ı câhid-i şer‘î mahzarında Mehmed b. Osman ve Ahmed b. Abdullah şehâdetleri ile sâbite mezbûr Handan Bey tarafından Mehmed b. Osman nâm kimesnenin dahi ba‘de’l-yevm semenini ahz u kabz ve kendüye îsâle vekîl olduğu hasm-ı münkir mahzarında Mehmed b. Hüseyin ve Ahmed b. Abdülmennan şehâdetleri ile şer‘an sâbit oldukdan sonra merkūm el-Hâc Mehmed mahfil-i kazâda işbu râfi‘u’l-kitâb Mehmed Beşe b. Hasan mahzarında ikrâr ve takrîr-i kelâm edip müvekkil-i mezbûrun mahmiye-i İstanbul’da Gurebâ Hüseyin Ağa Mahallesi’nde vâki‘ iki tarafı Ali Efendi mülkü ve bir tarafı Ahmed Çelebi mülkü ve bir tarafı tarîk-i âm ile mahdûd olup arsasının merhûm Hürrem b. Abdullah nâm sâhibü’l-hayrın vakfına senede yüz seksen akçe mukāta‘ası olan mülk menzilini cümle tevâbi‘ ve levâhıkı ve kâffe-i menâfi‘ ve merâfıkı ile mezbûr Mehmed Beşe’ye ba‘de’l-müzâyede ve inkıtâ‘i’r-rağbeti’n-nâs yirmi sekiz bin fıddî-i Osmânî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile vekâletim hasebiyle bey‘ ve teslîm eyledim ol dahi iştirâ ve tesellüm eyledi dedikde gıbbe’t-tasdîkı’ş-şer‘î vekîl-i âhar mezbûr Mehmed b. Osman dahi merkūm Mehmed Beşe b. Hasan mahzarında ikrâr u i‘tirâf edip mezkûr el-Hâc Mehmed’in mezbûr Mehmed Beşe’ye vekâleten bey‘ ve teslîm ol dahi iştirâ ve tesellüm eylediği menzil-i mahdûd-ı mezkûrun semen-i misli olan meblağ-ı merkūm yirmi sekiz bin akçeyi mezbûr Mehmed Beşe yedinden müvekkil-i mezbûra îsâl etmek için bi’t-tamam ve’l-kemâl vekâlet-i mahkiyem hasebiyle ahz u kabz eyledim, semen-i mezbûrdan zimmetinde bir akçe ve bir habbe bâkī kalmadı dedikde gıbbe’t-tasdîkı’l-mu‘teber mâ-hüve’l-vâki‘ bi’t-taleb ketb ü sebt olundu. Fi’l-yevmi’s-sâlis min-Cumâdelûlâ li-sene erba‘a ve sittin ve elf. Şuhûdü’l-hâl: el-Hâc Mehmed Ağa, Üskübî Ahmed Ağa, Nasuh Ağa el-cündî, Yazıcı Mehmed, Ahmed b. Sefer, Salih b. Hasan ve gayruhum mine’l-huzzâr.