Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 212 Hüküm no: 281 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lefter v. Vasil’in borcuna kefil olunduğu Hayyât tâifesinden Lefter v. Vasil meclis-i şer‘-i hatîr-i lâzımü’t-tevkīrde tüccâr tâifesinden Muhibzad demekle ma‘rûf işbu sâhibü’l-kitâb Dilaver b. Abdullah mahzarında ikrâr-ı tâm ve takrîr-i kelâm edip mezbûr Dilaver cihet-i deyn-i şer‘îden üç bin beş yüz otuz beş akçe ve gāib ani’l-meclis Hüseyin b. Ali nâm kimesneye olan altı yüz yirmi deynimi sen ver de ben sana vereyim deyü emr eyleyip mezbûr Dilaver dahi benim emrimle mezbûra verdiği altı yüz yirmi akçe ki cem‘an dört bin yüz elli beş akçe zimmetimde lâzımü’l-edâ deynim olup meblağ-ı mezbûru def‘aten edâya iktidârım olmamağla mezbûr Dilaver târîh-i kitâbdan her yedi günde ikişer yüz yedişer akçe vermek üzere yüz elli gün tamamına değin beni taksît ve te’cîl eyledi, meblağ-ı mezbûr merkūm Dilaver’e minvâl-i muharrer üzere mukassat deynimdir dedikde mukırr-ı mezbûrun cârî olan kelimâtını el-mukarru lehü’l-merkūm Dilaver vicâhen tasdîk ve şifâhen tahkīk eyledikden sonra işbu hâzırân bi’l-meclis Yorgi v. Dimitri ve zevce[si] Azmara bt. Dimitri meblağ-ı mezbûra emr ve kabûlü hâvî kefâletle herbiri kefîl bi’l-mâl olmağın mâ-vaka‘a bi’t-taleb ketb olundu. Fi’l-yevmi’r-râbi‘ min-Cumâdelûlâ li-sene erba‘a ve sittin ve elf. Şuhûdü’l-hâl: İbrahim Çelebi b. Davud, Pîrî b. Hüseyin, Rıdvan b. Abdullah, Muharrem b. Abdullah, el-Hâc Şa‘ban b. Mehmed.