Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 213 Hüküm no: 282 Orijinal metin no: [42a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Fethullah’ın kölesini azat ettiği Mahmiye-i İstanbul’da Hoca Hayreddin Mahallesi’nde sâkin el-Hâc <> Fethullah b. Abdullah tarafından i‘tâk-ı âti’z-zikri ikrâra vekîl olup Receb Beşe b. Ahmed ve İslam Beşe b. Mustafa nâm kimesneler şehâdetleriyle şer‘an vekâleti sâbite olan Ali Çelebi b. Mustafa meclis-i şer‘-i hatîr-i lâzımü’t-tevkīrde kendüye rıkkını mu‘terif olan işbu râfi‘u’l-kitâb orta boylu, açık kaşlı, gök ela gözlü, sarı sakallı, Rusiyyü’l-asl Piyale b. Abdullah mahzarında bi’l-vekâle ikrâr ve takrîr-i kelâm edip müvekkil-i mezbûr el-Hâc Fethullah evsâf-ı mezkûre ile mevsûf-ı merkūm Piyale’yi hasbeten lillâhi te‘âlâ mâlından i‘tâk ve tahrîr ve silk-i efrâd-ı asliyyîne idhâl ve ihrâc eyledi, ba‘de’l-yevm gulâm-ı mezbûr sâir ahâr-ı asliyyîn gibi hür olup müvekkil-i mezbûrun üzerinde velâdan gayrı hakkı kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’r-râbi‘ min-Cemâziyelûlâ li-sene erba‘a ve sittin ve elf. Şuhûdü’l-hâl: Kara Şa‘ban Beşe b. Hüseyin, İbrahim Çelebi b. Davud, Pîrî Beşe b. Hüseyin, Mehmed Çelebi b. Hüseyin, Hasan Beşe b. Mehmed, Ca‘fer Beşe b. Ali, Ali Beşe b. Ali, Mehmed Beşe b. Ahmed, Mustafa Beşe b. İbrahim, Rıdvan b. Abdullah, el-Hâc Şa‘ban b. Ahmed, Kara Halil b. Mehmed, Ramazan Beşe b. Yusuf, Yusuf Beşe b. Sadi ve gayruhum.