Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 214 Hüküm no: 284 Orijinal metin no: [42b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mustafa ile Ömer b. Mustafa’nın muhalaa yoluyla boşandıkları Mahmiye-i İstanbul’da Hüseyin Ağa Mahallesi’nde sâkine Emine bt. Mustafa nâm hatun mahfil-i kazâda zevci işbu hâmilü’l-kitâb Ömer b. Mustafa mahzarında ikrâr ve takrîr-i kelâm edip zevcim mezbûr Ömer ile ma‘kūdün-aleyh olup zimmetinde mütekarrer olan bin akçe mehr-i müeccelim ve nafaka-i iddet ve meûnet-i süknâm ve bir döşek ve bir yasdık üzerine muhâla‘a-i sahîha-i şer‘iyye ile hul‘ eyledik, mezbûr ile hukūk-ı zevciyete müte‘allik min-ba‘d da‘vâ ve nizâ‘ımız kalmadı dedikde mukırr-ı mezbûr Ömer’in ber-vech-i meşrûh cârî ve sâdır olan ikrâr ve takrîrini el-mukarru lehü’l-merkūm Ömer vicâhen tasdîk ve mezbûr Emine ile minvâl-i muharrer üzere hul‘ eylediklerini şifâhen tahkīk etmeğin mâ-vaka‘a gıbbe’t-taleb ketb olundu. Fî-yevmi’s-sâdis min-Cemâziyelûlâ li-sene erba‘a ve sittin ve elf. Şuhûdü’l-hâl: Mahmud b. Mustafa, Mehmed b. Abdullah, Pîrî Beşe b. Abdullah, Mehmed Çelebi b. Hüseyin, Muharrem b. Abdullah ve gayruhum.