Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 214 Hüküm no: 285 Orijinal metin no: [42b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi’nin mahzen arsasının yarısını Osman Beşe’ye sattığı Mahmiye-i Kostantıniyye hısnı ebvâbından Odunkapısı kurbünde mütemekkin olup Ağa-yı mu‘temed demekle ma‘rûf olan Mustafa Çelebi b. Mehmed mahfil-i kazâda işbu bâ‘isü’l-kitâb Osman Beşe b. Himmet mahzarında ikrâr-ı tâm ve takrîr-i kelâm edip silk-i mülkümde muntazam olup medîne-i İznikmid’de vâki‘ bir tarafı Elliikinci ağa bölüğünün vakıf mahzenine ve bir tarafı leb-i deryâ ve bir tarafı kâriz ve bir tarafı tarîk-i âm ile mahdûd olan mahzen arsasının nısf-ı şâyi‘ini mezbûr Osman Beşe’ye on iki bin nakd râyic fi’l-vakt fıddî-i Osmânî akçeye tarafeynden îcâb [ve] kabûlü hâvî bey‘-i bâtt-ı sahîh-i şer‘î ile bey‘ edip ol dahi minvâl-i muharrer üzere iştirâ ve kabûl eyledikden sonra semeni olan meblağ-ı mezbûr on iki bin akçeyi yedinden bi’t-tamam ve’l-kemâl ahz u kabz edip mebî‘-i mezbûru mahallinde tesellüme müşteri-i merkūm Osman Beşe’yi taslît eyledim ba‘de’l-yevm zikrolunan mahzen arsasının nısf-ı şâyi‘i merkūm Osman Beşe’nin mülk-i müşterâsı olmuşdur, keyfe mâ yeşâ’ ve yehtâr mutasarrıf olsun dedikde gıbbe’t-tasdîk ve’t-taleb mâ-vaka‘a ketb olundu. Fi’l-yevmi’s-sâbi‘ min-Cemâziyelûlâ li-sene erba‘a ve sittin ve elf. Şuhûdü’l-hâl: el-Hâc Mehmed b. Arslan, Aydın Reis b. Ahmed, Mehmed b. İlyas, Ahmed Beşe b. Bayram, Ali Beşe b. Abdullah, İbrahim Çelebi b. Davud, Rıdvan b. Abdullah, Mehmed Bey el-cündî, Derviş b. Ali ve gayruhum mine’l-hâzırîn.