Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 215 Hüküm no: 287 Orijinal metin no: [42b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çavuş’un susam satışından alacağı olduğu İşbu sâhibü’l-kitâb Mustafa Çavuş b. İbrahim mahfil-i şer‘i şerîfde mahmiye-i İstanbul’da Topkapısı dâhilinde şîrugancı tâifesinden Çako v. İstavranoz ve şerîki olup li-ebeveyn karındaşı Bedros nâm Ermeniler muvâcehelerinde üzerlerine da‘vâ ve takrîr-i kelâm edip mezbûrân Çako ve Bedros’a her keyli doksan yedişer akçeye olmak üzere yirmi dokuz bin beş yüz seksen beş akçeye üç yüz beş keyl simsim bey‘ ve teslîm, mezbûrân dahi ale’l-iştirâki’s-seviyy iştirâ ve tesellüm eylemişler idi. Hâlâ semeni olan meblağ-ı mersûm yirmi dokuz bin beş yüz seksen beş akçeyi taleb ederim, suâl olunsun dedikde gıbbe’s-suâl mezbûrân Çako ve Bedros cevâblarında fi’l-vâki‘ vech-i muharrer üzere müdde‘î-i mezbûra simsim bahâsından iştirâk-i seviyy üzere yirmi dokuz bin beş yüz seksen beş akçe deynimiz vardır deyü bi-tav‘ihi herbiri ikrâr u i‘tirâf ettiklerinde edâsına tenbîh-birle mâ-vaka‘a bi’t-taleb ketb olundu. Fi’t-tâsi‘ min-Cumâdelûlâ li-sene erba‘a ve sittin ve elf. Şuhûdü’l-hâl: Ali Beşe b. Abdullah çukadâr, Pîrî Beşe b. Hüseyin, Mehmed Çelebi b. Hüseyin, Rıdvan b. Abdullah ve gayruhum mine’l-huzzâr.