Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 216 Hüküm no: 288 Orijinal metin no: [43a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey’in kahve aldığı Zülfikâr Bey’e borcu olduğu Vilâyet-i Anadolu’da Diyarbekir eyâletinde Çemişgezek kasabası ahâlîsinden Mehmed Bey b. Lütfullah nâm cündî meclis-i şer‘-i hatîr-i lâzımü’t-tevkīrde sipâh zümresinden işbu sâhibü’l-kitâb Zülfikār Bey b. Abdullah mahzarında ikrâr-ı tâm ve takrîr-i kelâm edip mezbûr Zülfikār Bey yedinden târîh-i kitâbdan yüz otuz beş gün tamamına müeccel ve mev‘ûde her vakıyyesi doksan bir akçeye olmak üzere müşterâ ve makbûzum olan bin vakıyye kahve bahâsından doksan bin akçe deynim olup ecel-i mezbûr hulûlünde vech-i muharrer üzere meblağ-ı mezbûr doksan bin akçe mezbûr Zülfikār Bey’e zimmetimde lâzımü’l-edâ ve vâcibü’l-kazâ deynimdir dedikde gıbbe’t-tasdîkı’ş-şer‘î meblağ-ı mezbûr doksan bin akçenin cem‘îsine işbu hâzirûn bi’l-meclis Hüseyin Bey b. Abdullah ve Mustafa b. Ahmed ve Ermeni tâifesinden Pirzâde v. Babacan ve karındaşı İsrafil Keşiş nâm kimesnelerden herbiri emr ve kabûlü hâvî kefâlet ile kefîl bi’l-mâl oldukdan sonra asîl-i mezbûr Mehmed Bey’in ve kefîl-i mezbûrûnun nefislerine ve hîn-i mutâlebede meclis-i şer‘-i şerîfe ihzârlarına işbu hâzırân bi’l-meclis olan Ahmed Beşe b. Abdullah ve Sinan b. Abdullah nâm kimesneler kefîller olmağın mâ-hüve’l-vâki‘ gıbbe’t-taleb ketb ü sebt olundu. Fi’l-yevmi’t-tâsi‘ min-Cemâziyelûlâ li-sene erba‘a ve sittin ve mi’e ve elf. Şuhûdü’l-hâl: Hasan Çelebi b. Abdurrahman, Usta Yusuf b. Abdullah, el-Hâc Mehmed b. Yusuf, el-Hâc Said b. Yahya, Ahmed Çelebi b. Mustafa, Rıdvan Beşe b. Abdullah, Pîrî Beşe b. Hüseyin, Mehmed Çelebi b. Hüseyin ve gayruhum mine’l-huzzâr.