Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 217 Hüküm no: 290 Orijinal metin no: [43a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Selim Ağa’nın terekesinden hanımı Ayşe bt. Hasan Usta’nın mihrinin ödenmesi Gıbbe’t-taleb ve’l-iltimâs cânib-i şer‘-i kaviyyü’l-esâsdan bu fakīr hadâik-ı sultâniyeden hasbağçeye varılıp zeyl-i kitâbda mastûrü’l-esâmî olan Müslimîn huzûrlarında akd-i meclis-i şer‘-i şerîf olundukda sabıkā hâssa bostancılar odabaşısı olup bundan [akdem] vefât eden Selim Ağa’nın verâseti zevce-i metrûkesi fahrü’l-muhadderât Âişe Hatun bt. Hasan Usta’ya ve vâlidesi ( ) nâm hatuna ve sulbî oğlu Mehmed ve sulbiye kızı Afife nâm sagīrlere münhasıra olduğu meclis-i mezbûrda sâbit ve zâhir oldukdan sonra mezbûr Âişe Hatun tarafından husûs-ı âti’z-zikre vekîl olup vekâleti hasm-ı câhid-i şer‘î mahzarında mezbûrenin zâtını ma‘rifet-i şer‘iyye ile ârifân olan Mustafa b. Mehmed ve Dilaver b. Abdullah şehâdetleri ile şer‘an sâbite olan işbu bâ‘isü’l-kitâb İbrahim Beşe b. Mehmed nâm kimesne sagīrân-ı mezbûrânın tesviye-i umûrlarına kıbel-i şer‘den mansûb vasîleri olup müteveffâ-i mezbûrun muhallefâtına vâzı‘u’l-yed olan merkūm Hasan Usta mahzarında bi’l-vekâle üzerine da‘vâ edip müvekkilem mezbûre Âişe Hatun nefsini müteveffâ-i mezbûra tezvîc eyledikde yetmiş bin fıddî-yi Osmânî akçe mehr-i müeccel tesmiye olunup müteveffâ-i mezbûr dahi ol minvâl üzere tezvîc ve kabûl edip akd ve nikâh olunmuş idi. Hâlâ meblağ-ı mezbûru vekâletim hasebiyle müteveffâ-i mezbûrun tereke-i vâfiyesinden taleb ederim, suâl olunsun dedikde, gıbbe’s-suâl mezbûr Hasan Usta cevâbında müvekkile-i mezbûrenin mehr-i müecceli yetmiş bin akçe olduğu ma‘lûmum değildir deyü inkâr etmeğin vekîl-i mezbûrdan müdde‘âsına mutâbıka beyyine taleb olundukda udûl-i Müslimîn’den Osman Ağa b. Gazanfer ve Mehmed Ağa b. Deli Bekir ve Mustafa Ağa b. Ömer ve Mustafa Ağa b. Abdullah li-ecli’ş-şehâde meclis-i şer‘a hâzirûn olup istişhâd olunduklarında fi’l-hakīka müvekkil-i mezbûr Âişe Hatun’dan müteveffâ-i mezbûra tezvîc eyledikde yetmiş bin akçe mehr-i müeccel tesmiye olunup müteveffâ-i mezbûr mehr-i müeccel tesmiye olunup müteveffâ-i mezbûrdan ol minvâl üzere tezvîc ve kabûl edip bizim huzûrumuzda akd ve nikâh olunmuşdu, mezbûre Âişe Hatun’un mehr-i müecceli yetmiş bin akçedir, biz bu husûsa şâhidleriz şehâdet dahi ederiz deyü herbiri edâ-yı şehâdet-i şer‘iyye eylediklerinden sonra müvekkile-i mezbûre Âişe Hatun’un vech-i şer‘î üzere tahlîf olundukdan sonra meblağ-ı mezbûru müteveffâ-i merkūmun tereke-i vâfiyesinden edâ etmek üzere merkūm Hasan Usta’ya tenbîh olunup mâ-vaka‘a ketb olundu. Fi’l-yevmi’t-tâsi‘ min-Cumâdelûlâ li-sene erba‘a ve sittin ve elf. Şuhûdü’l-hâl: Hüseyin Efendi b. İsmail, Mahmud Efendi b. Ahmed, İbrahim Çelebi b. Davud, Pîrî Bey b. Hüseyin.