Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 218 Hüküm no: 292 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Kapudan’ın kahve parasından Said Çelebi’ye borcu olduğu Mahmiye-i Galata hâricâtından kasaba-i Kasımpaşa’da Câmi‘-i kebîr Mahallesi sâkinlerinden olup Tersâne-i âmire kapudanlarından fahrü’l-emâsil ve’l-a‘yân Mehmed Kapudan b. Bayram Kapudan meclis-i şer‘-i şerîf-i lâzımü’t-teşrîfde mahmiye-i İstanbul’da Gül Câmi‘-i şerîfi Mahallesi’nde sâkin fahrü’t-tüccâr Said Çelebi b. Kasım muvâcehesinde ikrâr-ı tâm ve takrîr-i kelâm edip mezbûr Said Çelebi’nin yedinden müşterâ ve makbûzum olup târîh-i kitâbdan üç yüz altmış gün tamamına değin müeccel ve mev‘ûde vakıyyesi doksanar akçeye olmak üzere iki bin beş yüz vakıyye kahve bahâsından cem‘an iki yüz yirmi beş bin akçe ki bi-hesâb-ı guruş iki bin altı yüz kırk altı guruş ve seksen akçe olur meblağ-ı mezbûr ecel-i merkūm hulûlünde zimmetimde edâsı lâzım deynimdir dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-âşir min-Cumâdelûlâ li-sene erba‘a ve sittin ve elf. Şuhûdü’l-hâl: el-Hâc Abdülbâki b. Mustafa, Mustafa Efendi b. Hızır el-imâm, Mehmed b. Said, Ömer b. Ali, el-Hâc Abdurrahman b. Ali, el-Hâc İsa b. Abdülmümin, Ahmed b. Mehmed, İbrahim Çelebi b. Pervane, Mustafa b. İbrahim ve gayruhum mine’l-huzzâr.