Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 219 Hüküm no: 293 Orijinal metin no: [43b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Selim Ağa’nın hayatta iken kölesini vasiyet ile âzat etmiş olduğu Gıbbe’t-taleb ve’l-iltimâs cânib-i şer‘-i kaviyyü’l-esâsdan bu fakīr hadâik-ı sultâniyeden hasbağçeye varılıp zeyl-i kitâbda mastûrü’l-esâmî olan Müslimîn huzûrlarında akd-i meclis-i şer‘-i şerîf olundukda işbu bâ‘isü’l-kitâb uzun boylu, çatık kaşlı, elâ gözlü, Efrenciyyü’l-asl Ali b. Abdullah nâm şâb ve emred meclis-i mezbûrda sabıkā bostancılar odabaşısı olup bundan akdem vefât eden Selim Ağa merhûmun eytâm ve sıgārına kıbel-i şer‘-i şerîfden mansûb vasîsi olan Hasan Usta b. Mehmed mahzarında üzerine da‘vâ edip ben müteveffâ-i mezbûrun abd-i memlûkü olmağile müteveffâ-i mezbûr beni tedbîr-i mutlak ile tedbîr edip sülüs-i mâlı dahi kıymetinden nice mertebe ziyâde olmağile sâir ahrâr gibi hür olmuş iken vasiyy-i mezbûr beni müteveffâ-i merkūmun muhallefâtından olmak zu‘mu ile vaz‘-ı yed eder, suâl olunup üzerimden kasr-ı yed ile tenbîh olmak murâdımdır dedikde gıbbe’s-suâl ve akībe’l-inkâr mevsûf-ı mezbûrdan müdde‘âsına muvâfık beyyine taleb olundukda udûlden Hasan Çavuş b. Ahmed ve Osman Bey b. İslâm nâm kimesneler li-ecli’ş-şehâde meclis-i şer‘de istişhâd olunduklarında fi’l-hakīka müteveffâ-i mezbûr Selim Ağa abd-i memlûkü mevsûf-ı mezbûr Ali’yi tedbîr-i sahîh-i mutlak ile bizim huzûrumuzda müdebber eyledi ve müteveffâ-i mezbûrun sülüs-i mâlı mevsûf-ı mezbûrun kıymetinden nice mertebe ziyâdedir bu husûsa biz şâhidleriz şehâdet dahi ederiz deyü edâ-yı şehâdet-i şer‘iyye eylediklerinden sonra ba‘de’t-ta‘dîl ve’t-tezkiye şehâdetleri makbûle olmağın mûcebince hüküm-birle mâ-vaka‘a bi’t-taleb ketb olundu. Fi’l-yevmi’t-tâsi‘ min-Cumâdelûlâ li-sene erba‘a ve sittî ve elf. Şuhûdü’l-hâl: el-Hâc Abdi b. Ca‘fer, Mahmud Efendi b. el-merhûm Hüseyin Bey, Terekecibaşı İsmail Bey, Muzaffer Beşe b. Abdullah, Aydın Bey b. Ali, Mustafa Bey b. Mehmed, İbrahim Çelebi b. Davud.