Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 219 Hüküm no: 294 Orijinal metin no: [43b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Hatun’un cariyesini azat ettiği Mahmiye-i İstanbul’da hâlâ Arabacılar meydânı kurbünde sâkine fahrü’l-muhadderâti’l-mükerreme zahru’l-muvakkarâti’l-mu‘azzama Safiye Hatun bt. el-mezbûr Mustafa Efendi taraf-ı bâhirü’ş-şereflerinden ıtk-ı âti’l-beyânı âzâda vekîli olup vekâleti müşârun-ileyhânın zâtını ma‘rifet-i şer‘iyye ile ârifân olan Ali Bey b. Bünyad ve Hamza b. Abdullah şehâdetleri ile şer‘an sâbite olan bazara giden? Râbia bt. Abdullah mahfil-i kazâya gelip bi’l-vekâle ikrâr ve takrîr-i kelâm edip müvekkile-i müşârun-ileyhâ hazretleri silk-i mülkünde münselike olup rıkkına mu‘terife olan işbu hâmiletü’l-kitâb uzun boylu, elâ gözlü, açık kaşlı, sarışın, Rusiyyetü’l-asl Nağmesaz bt. Abdullah nâm câriyesini târîh-i kitâbdan bir sene mukaddem hasbeten lillâhi te‘âlâ ve hasbeten li-rûhi rasûlihi’l-mu‘âllâ tahrîr ve i‘tâk edip rakabesini zîk-ı mazîk-i rıkdan ıtlâk eyledi, ba‘de’l-yevm mevsûfe-i mezkûre sâir harâir gibi hürre olup üzerinde müvekkile-i mûmâ-ileyhânın velâdan gayrı hakkı kalmadı dedikde mezbûre Nağmesaz’ın ıtkına hüküm-birle mâ-vaka‘a bi’t-taleb ketb olundu. Fi’l-yevmi’l-âşir min-Cumâdelûlâ sene 1064. Şuhûdü’l-hâl: Hâmid <<Çavuş>> b. Abdullah, Zülfikār Efendi b. Abdullah, Beber Şa‘ban Bey, Mehmed Çelebi berber, İbrahim Çelebi b. Davud, Rıdvan [b.] Abdullah, Pîrî b. Hüseyin, el-Hâc Şa‘ban b. Ahmed ve gayruhum.