Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 220 Hüküm no: 296 Orijinal metin no: [44a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Selim Bey’in çocuklarına nafaka takdiri Hadîka-i hâssa bostancılarından olup sabıkā odabaşı olan bundan akdem müteveffâ olan Selim Bey’in sulbî sagīr oğlu Mehmed ve sulbiye sagīre kızı Afife’nin tesviye-i umûruna kıbel-i şer‘-i şerîfden mansûb vasîleri olan ve sagīrân-ı mezbûrânın cedleri işbu râfi‘u’l-kitâb Hasan Usta b. Mehmed meclis-i şer‘-i şerîfe gelip takrîr-i kelâm edip sagīrân-ı mezbûrânın babaları merkūm Selim Bey’den bi-hasebi’l-irsi’ş-şer‘î intikāl eden mallarından nafaka ve kisve ve mezbûrânın dâyeleri levâzımi’çün herbirine nafaka farz ve takdîr olunmak taleb ederim dedikde hâkim-i muvakki‘-ı kitâb tûbâ-lehû ve hüsnü-meâb hazerâtı mezbûrânın babaları müteveffâ-i mezbûrdan intikāl eden mallarından herbirine beher yevm on beşer akçeden beher yevm otuzar akçe farz ve takdîr edip meblağ-ı mefrûzu sarf ve vakt-i zarûretde istidâneye ve lede’z-zafer rücû‘a vasiyy-i merkūma izin-birle mâ-hüve’l-vâki‘ bi’t-taleb ketb olundu. Fi’t-târîhi’l-mezbûr. Eş-şuhûdü’s-sâbıkūn.