Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 221 Hüküm no: 297 Orijinal metin no: [44a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Selim Bey’in terekesinin vârisleri arasında paylaşıldığı Gıbbe’t-taleb ve’l-iltimâs cânib-i şer‘-i kaviyyü’l-esâsdan bu fakīr hadâik-ı sultâniyeden hâsbağçeye varılıp zeyl-i kitâb-ı müstetâbda mastûrü’l-ism olan Müslimîn huzûrlarında akd-i meclis-i şer‘-i şerîf olup sabıkā hâssa bostâncılar odabaşısı olup bundan akdem vefât eden Selim Bey’in verâseti zevce-i metrûkesi fahrü’l-muhadderât Âişe Hatun bt. Usta Hasan nâm hatun ve sulbî oğlu Mehmed ve sulbiye kızı Afife nâm sagīrlere münhasıra olduğu şer‘an sâbit ve zâhir oldukdan sonra mezbûre Âişe Hatun tarafından husûs-ı âti’l-beyânı ikrâra vekîl olup vekâleti hasm-ı câhid-i şer‘î mahzarında mezbûrenin zâtını ma‘rifet-i şer‘iyye ile ârifân olan İbrahim Beşe b. Mustafa ve sagīre-i mezbûrenin tesviye-i umûrlarına kıbel-i şer‘den mansûb vasîleri olan Hasan Usta b. Mehmed meclis-i mezbûrda müteveffâ-i mezbûrun zâhirde vâris-i ma‘rûfu olmamağla muhallefâtına vâzı‘u’l-yed olup hâlâ bostancıbaşı olan umdetü’l-havâs ve’l-mukarrebîn umdetü’l-mülûk ve’s-selâtîn Hasan Ağa taraflarından tasdîk-i âti’l-beyâna vekîl-i şer‘îleri olup hâlâ terekecibaşı olan iftihârü’l-emâsil ve’l-a‘yân İsmail Bey mahzarında herbiri ikrâr-ı tâm ve bast-ı merâm kılıp müteveffâ-i mezbûrun vech-i muharrer üzere mûmâ-ileyh yedlerinde mazbûta olan muhallefâtı bi-hasebi’l-irsi’ş-şer‘î sümünü zevce-i metrûkesi mezbûre Âişe’ye ve bâkīsi “li’z-zekeri mislü hazzi’l-ünseyeyn” sagīrân-ı mezbûrâna intikāl etmeğin vesâyet ve vekâletim hasebiyle herbirimiz mezbûrların hisselerin bi’t-tamam ahz u kabz ve istîfâ eyleyip mûmâ-ileyh Hasan Ağa hazretleri yedlerinde muhallefât-ı mezbûreden bir akçe ve bir habbe bâkī kalmadı, ba‘de’l-yevm mazmûn-ı kitâba muhâlif da‘vâ sudûr ederse lede’l-hükkâmi’l-kirâm makbûle ve ısgā olunmasın dedikde gıbbe’t-tasdîkı’ş-şer‘î bi’t-taleb ketb olundu. Fi’l-yevmi’s-sânî aşer min-Cumâdelûlâ li-sene erba‘a ve sittin ve elf. Şuhûdü’l-hâl: Terekecibaşı İsmail Bey, Mahmud Efendi b. el-merhûm Hüseyin Bey, Mustafa Bey b. Mehmed, Aydın Bey b. Bekir.