Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 222 Hüküm no: 299 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şivekâr Hatun’un evini sattığı Mahmiye-i İstanbul’da Hasanpaşa Mahallesi’nde sâkine fahrü’l-muhadderât Şivekâr Hatun bt. Abdullah tarafından husûs-ı âti’l-beyânı ikrâra vekîl olup vekâleti hasm-ı câhid-i şer‘î mahzarında mezbûrenin zâtını ma‘rifet-i şer‘iyye ile ârifân olan Mehmed Beşe b. Mustafa ve Mehmed Çelebi b. Ahmed şehâdetleri ile şer‘an sâbite olan fahrü’l-akrân Mustafa Efendi b. Sinan mahfil-i kazâda işbu hâmilü’l-kitâb umdetü’l-a‘yân İbrahim Ağa b. Kurd mahzarında bi’l-vekâle ikrâr-ı tâm ve takrîr-i kelâm edip müvekkilem mezbûre Şivekâr Hatun icâre-i mu‘accele ve yevmî bir akçe ücret-i müeccele ile merhûm Hayreddin Çavuş Vakfı’ndan işbu akdin sudûruna değin mutasarrıfe olduğu medîne-i Üsküdar mahallâtından Atpazarı kurbünde Bulgurlu Mahallesi’nde vâki‘ bir tarafı yine merhûm ve mezbûr Hayreddin Çavuş binâ eylediği vakıf hân ve iki tarafı merhûm Abdurrahman Paşa Vakfı ve bir tarafı tarîk-i âm ile mahdûd birbirine muttasıl iki bâb fevkānî odaları ve altında ahırı ve bir kubbeli hamamı ve câmekânı ve külhânı ve külhân önünde eşcâr-ı müsmireyi muhtevî hadîkayı ve odalar önünde dahi bir mikdâr hadîkayı ve hân tarafında bir samanlık ve bir odayı ve hamam yanında bi’r-i mâyı müştemil olan menzilin hakk-ı tasarrufu vakf-ı mezbûr mütevellîsi ma‘rifetiyle mûmâ-ileyh İbrahim Ağa’ya sekiz yüz kıt‘a riyâl guruş bedel mukābelesinde ferağ ve tefvîz ve teslîm edip ol dahi menzil-i mahdûd-ı mezkûru minvâl-i muharrer üzere kabûl ve tefvîz ve tesellüm eyledikden sonra bedel-i tefvîz olan meblağ-ı merkūm sekiz yüz kıt‘a riyâl guruşu yedinden bi’t-tamam ve’l-kemâl ahz u kabz eyledi, ba‘de’l-yevm müvekkile-i mezbûrenin menzil-i merkūmda alâka ve medhali kalmayıp mûmâ-ileyh İbrahim Ağa’nın dâhil-i taht-ı tasarrufu olmuşdur dedikde vekîl-i mezbûr Mustafa Efendi’nin ber-vech-i meşrûh üzere cârî ve sâdır olan ikrâr ve takrîri el-mukarru lehü’l-merkūm İbrahim Ağa vicâhen tasdîk ve şifâhen tahkīk etmeğin mâ-vaka‘a bi’t-taleb ketb ü sebt olundu. Tahrîren fi’r-râbi‘ aşer min-Cumâdelûlâ li-sene erba‘a ve sittin ve elf. Şuhûdü’l-hâl: Şa‘ban Bey b. İsmail, Ahmed Ağa b. Mustafa, İsmail Çelebi b. Osman, Ali Çelebi er-râcil, Mehmed Çelebi b. Hüseyin, Mehmed b. Abdullah ...? ve gayruhum mine’l-huzzâr.