Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 223 Hüküm no: 300 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Selim Ağa’nın borcu ödendikten ve diğer masrafları çıktıktan sonra geri kalan malların vârisleri arasında paylaştırıldığı Sabıkā hâssa bostancılar odabaşısı olup bundan akdem vefât eden Selim Ağa merhûmun zevce-i metrûkesi Âişe bt. Hasan Usta’ya ve vâlidesi ( ) nâm hatun ve sulbî oğlu Ahmed ve sulbiye kızı Afife nâm sagīrelere münhasıra olup tashîh meselesi olan yetmiş iki sehmden dokuz sehmi zevcesine ve on iki sehmi vâlidesine ve otuz dört sehmi mezbûr Ahmed’e ve on yedi sehmi mezbûre Afife’ye isâbet eylediği şer‘an zâhir ve mütebeyyen oldukdan sonra mezbûre Âişe Hatun tarafından husûs-ı âti’z-zikri ikrâra vekîli olup vekâleti hasm-ı câhid-i şer‘î mahzarında mezbûrenin zâtını ma‘rifet-i şer‘iyye ile ârifân olan Mustafa b. Mehmed ve Dilaver b. Abdullah şehâdetleri ile şer‘an sâbite olan İbrahim Beşe b. Mustafa mahfil-i kazâda sagīrân-ı mezbûrânın dedeleri ve tesviye-i umûrlarına kıbel-i şer‘den mansûb vasîleri olup müteveffâ-i mezbûrun muhallefâtına vâzı‘u’l-yed olan işbu bâ‘isü’l-kitâb merkūm Hasan Usta b. Mehmed mahzarında bi’l-vekâle ikrâr-ı tâm ve takrîr-i kelâm edip mezbûr Hasan Usta’nın yedinde olan işbu mümzâ ve mahtûm defter mûcebince müteveffâ-i mezbûrun mecmû‘-ı muhallefâtı altı yük beş bin yüz akçe olup meblağ-ı mezbûrdan müteveffâ-i mezbûrun techîz ve tekfîn vesâir mesârif-i lâzımesi için on bin yedi yüz seksen bir akçe harc ve sarf olunup ve müvekkile-i mezbûre Âişe Hatun’un yetmiş bin akçe mehr-i müeccel mes’elesi ve seksen üç bin iki yüz yetmiş guruş sâir düyûn-ı müsbitesi ma‘rifet-i şer‘ ile edâ olundukdan sonra kırk altı bin akçe dahi hadîka-i hâssada resm alınıp beyne verese üç yük <> doksan beş bin kırk dokuz akçe bâkī kalmış idi. El-hâletü hâzihî meblağ-ı mezbûr üç yük doksan beş bin kırk dokuz akçeden sihâm-ı mezbûr mukābelesinde müvekkile-i mezbûreye isâbet eden kırk dokuz bin üç yüz yetmiş dört akçe hakk-ı müvekkile-i mezbûreyi ahz u kabz edip ve sagīrân-ı mezbûrâna isâbet eden iki yük yetmiş dokuz bin yedi yüz seksen sekiz akçeyi dahi vesâyeti hasebiyle merkūm Hasan Usta ahz u kabz edip min-ba‘d müteveffâ-i mezbûrun muhallefâtına müte‘allık birbiri ile da‘vâ ve nizâ‘ları kalmadı dedikde vekîl-i mezbûr İbrahim Beşe’nin ber-vech-i meşrûh cârî ve sâdır olan ikrâr ve takrîrine el-mukarru lehü’l-merkūm Hasan Usta vicâhen tasdîk ve sagīrân-ı mezbûrâna zikrolunan iki yük yetmiş dokuz bin yedi yüz seksen sekiz akçe haklarını vesâyeti hasebiyle kabz eylediğine şifâhen tahkīk eylemeğin mâ-hüve’l-vâki‘ gıbbe’t-taleb ketb ü sebt olundu. Fi’l-yevmi’l-hâmis aşer min-Cumâdelûlâ li-sene erba‘a ve sittin ve elf. Şuhûdü’l-hâl: İftihârü’l-emâcid ve’l-ekârim Hasan Ağa b. ( ) hassa[sarracân] ...?, umdetü erbâbi’t-tahrîr ve’l-kalem Mahmud Efendi b. Hüseyin, İsmail Bey b. Hüseyin terekebaşı, Mehmed Bey kâtib ...?, Osman Bey b. ( ) haseki, Mahmud Bey pazarcı-yı sâbık, Hazînedâr Ebûbekir Bey b. Ahmed, Uncubaşı Süleyman Bey, Hasan Bey aşcıbaşı, Mu‘temed Kara Süleyman Bey, el-Hâc Abdi Bey, Hasan Çavuş b. Ahmed, Başeski Şa‘ban Bey Aşağı odalı, Mustafa Çelebi b. Abdullah, Salih Bey kuşcubaşı, At oğlanı Hasan Bey ve gayruhum mine’l-huzzâr.