Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 224 Hüküm no: 301 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Petro v. Petko’nun ortaklaşa sahip oldukları eşyayı Dimitri’ye satıp parasını borçlularına havale ettiği Bozacı tâifesinden Petro v. Petko nâm zimmî mahfil-i kazâda şerîki işbu hâmilü’s-sifr Dimitri v. Zavac nâm Nasrânî muvâcehesinde ikrâr-ı tâm ve takrîr-i kelâm edip mahmiye-i İstanbul’da Balıkpazarı arpa anbarı kurbünde vâki‘ bozahânede olup mezbûr ile ale’s-seviyye mülkümüz olan bir büyük kazgan ve bir küçük kazgan ve bir değirmen ve yedi fıçı ve bir balta ve bir kalıp ve bir kasnak ve bir iskemle ve yirmi beş koğa ve otuz çiçek ve bir tonoz ve bir tabe ve on altı sinilerde olan nısf hisse-i şâyi‘alarımı mezbûr Dimitri’ye dört bin fıddî-yi Osmânî akçe[ye] tarafeynden îcâb ve kabûlü hâvî bey‘-i bâtt-ı kat‘î ile bey‘ ve teslîm edip ol dahi minvâl-i muharrer üzere iştirâ ve tesellüm eyledikden sonra semen-i mezbûr dört [bin] akçenin üç bin akçesini küberâdan Fâtıma Sultan -dâmet ismetuhâ- hazretlerine zimmetimde edâsı lâzım olan üç bin akçe deynim için müşârun-ileyhâ hazretlerinin teberdârlarından işbu hâzır bi’l-meclis Ali Bey [b.] Hüseyin’e havâle-i sahîha-i şer‘iyye ile havâle edip ol dahi kabûl eyledi ve bin akçesini dahi darı bahâsından işbu hâzır bi’l-meclis Bostancı Hüseyin Bey’e zimmetimde edâsı lâzım olan bin akçe deynim için mezbûr Hüseyin Bey’e havâle-i sahîha-i şer‘iyye ile havale eyledim, ol dahi kabûl eyledi, zikrolunan eşyâda min-ba‘d benim alâka ve medhalim kalmayıp cümlesi mülk-i müşterâsı ve hakk-ı sarfı olmuşdur, keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’l-mu‘teber mâ-vaka‘a bi’t-taleb ketb ü sebt olundu. Tahrîren fi’l-yevmi’l-ışrîn min-Cumâdelûlâ li-sene erba‘a ve sittin ve elf. Şuhûdü’l-hâl: Bozacılar Kethüdâsı Ayasofyalı Mehmed Beşe, Yiğitbaşı Mustafa Beşe, Hüseyin Beşe b. ( ) Mahmudpaşa’da, Kumkapı’da Hasan Beşe, Hasır iskelesinde Ali Beşe ve gayruhum.