Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 225 Hüküm no: 302 Orijinal metin no: [45a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rıdvan kethüdanın kızları Hatice ve Râbia’nın tarla ve çayırlarını Abdi Beşe b. Mehmed’e sattıkları Mahmiye-i İstanbul’da Yahnikapan Mahallesi sâkinelerinden fahrü’l-muhadderât Hadice ve Râbia ibnetey el-merhûm Rıdvan kethüdâ nâm hatunlar taraflarından husûs-ı âti’l-beyânı ikrâra vekîl olup vekâleti mezbûretânın zâtlarını ma‘rifet-i şer‘iyye ile ârifân olan Ahmed b. Abdullah ve Yusuf b. Abdullah şehâdetleri ile şer‘an sâbite olan mezbûre Hadice’nin li-ümm karındaşı Ali Çelebi b. Muharrem mahfil-i kazâda işbu râfi‘u’l-kitâb Abdi Beşe b. Mehmed mahzarında bi’l-vekâle ikrâr-ı tâm ve takrîr-i kelâm edip müvekkiletân-ı mezbûretân Hadice ve Râbia ale’l-iştirâki’s-seviyy mutasarrıfe oldukları Yoros kazâsından İrva [Riva] nâm karyede vâki‘ bir tarafı cebel ve bir tarafı tarîk-i âm ve bir tarafı İrva [Riva] suyu ve bir tarafı Paşa mandırasıyla mahdûd olan iki kıt‘a çayır ve müte‘addid tarlalarından herbirinin nısf-ı şâyi‘inin hakk-ı tasarruflarını sâhib-i arz ma‘rifetiyle merkūm Abdi Beşe’ye yedi bin akçe bedel mukābelesinden tefvîz edip ol dahi minvâl-i muharrer üzere tefevvüz ve kabûl eylediğinden sonra bedel-i tefvîz olan meblağ-ı merkūm yedi bin akçeyi mezbûr Abdi Beşe yedinden bi’t-tamam ve’l-kemâl ahz u kabz edip zikrolunan çayırlar ve tarlalardan herbirinin nısf-ı şâyi‘ini mahallinde tasarrufa merkūm Abdi Beşe’yi taslît eylediler dedikde vekîl-i mezbûrun ber-vech-i meşrûh cârî ve sâdır olan ikrâr ve takrîrini el-mukarru lehü’l-merkūm Abdi Beşe vicâhen tasdîk ve şifâhen tahkīk etmeğin mâ-hüve’l-vâki‘ bi’t-taleb ketb ü sebt olundu. Fi’l-yevmi’s-sâmin <> aşer min-Cumâdelûlâ li-sene erba‘a ve sittin ve elf. Şuhûdü’l-hâl: Mehmed Sofu b. Hüseyin, Abdüllatif Çelebi b. Mehmed kapıcı, Mustafa pazarcı, İvaz b. Hüseyin, Kara Hasan Beşe b. Şa‘ban, İbrahim Çelebi b. Davud ve gayruhum mine’l-huzzâr.