Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 226 Hüküm no: 304 Orijinal metin no: [45b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Beşe’nin Mehmed b. Ali’ye bir sandık içinde para emanet ettiğine dair iddiasını ispat edemediği Zümre-i râcilînden Hüseyin Beşe b. Süleyman mahfil-i kazâda işbu bâ‘isü’l-kitâb Mustafa b. Hızır nâm kimesneyi ihzâr ve üzerine da‘vâ edip mezbûr Mustafa’nın Odunkapısı hâricinde vâki‘ sandıkçı dükkânında şerîki olan işbu hâzır bi’l-meclis Mehmed b. Ali nâm kimesneye bir mukaffel sandık içinde altı bin akçe emânet vaz‘ eylemiş idim. Hâlâ meblağ-ı mezbûru merkūm Mustafa hufyeten ahz u kabz eylemişdir, suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına mutâbıka beyyine taleb olundukda ikāmet-i beyyineden ızhâr-ı acz ile istihlâf edip merkūm Mustafa’ya müdde‘î-i mezbûrun zikrolunan sandıkdan altı bin akçesini ahz u kabz eylemediğine cânib-i şer‘den yemîn teklîf olundukda ol dahi hasebi’l-mesûl yemîn bi’llâhi te‘âlâ etmeğin mûcebince müdde‘iye-i mezbûr bî-vech ta‘arruzdan men‘ olunup mâ-hüve’l-vâki‘ gıbbe’t-taleb ketb olundu. Fi’l-yevmi’l-erba‘a aşer min-Cumâdelûlâ li-sene erba‘a ve sittin ve elf. Şuhûdü’l-hâl: İbrahim Çelebi b. Davud, Mehmed Çelebi b. Hüseyin, Pîrî b. Hüseyin, Rıdvan b. Abdullah ve gayruhum mine’l-huzzâr.