Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 226 Hüküm no: 305 Orijinal metin no: [45b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abraham v. Şemail’in incir bahasından borcu olduğu Tüccâr tâifesinden ba‘isü’l-kitâb İbrahim Beşe b. el-Hâc Yusuf nâm kimesne meclis-i şer‘-i hatîr-i lâzımü’t-tevkīrde Selanik cemâ‘atinden Abraham v. Şemail nâm Yahûdi muvâcehesinde üzerine da‘vâ ve takrîr-i kelâm edip mezbûr Abraham zimmetinde yedimden müşterâ ve makbûz vezn ve mikdârı beynimizde ilm-i şer‘i ile ma‘lûm incir bahâsından bin fıddî râyic fi’l-vakt akçe hakkım vardır, suâl olunsun dedikde gıbbe’s-suâl mezbûr Abraham cevâbında fi’l-hakīka müdde‘î-i mezbûr İbrahim Beşe’ye incir bahâsından zimmetinde lâzımü’l-edâ ve vâcibü’l-[kazâ] bin akçe deynim vardır deyü tav‘an ikrâr u i‘tirâf etmeğin mûcebince meblağ-ı mezbûr bin akçeyi müdde‘î-i merkūm İbrahim Beşe’ye edâ ve teslîme mezbûr Abraham’a tenbîh-birle mâ-vaka‘a bi’t-taleb ketb olundu. Tahrîren fi’l-yevmi’s-sâdis aşer min-Rebî‘ülâhir li-sene erba‘a ve sittin ve elf. Şuhûdü’l-hâl: İbrahim Çelebi b. Davud er-ressâm, Pîrî Beşe b. Hüseyin, Mehmed b. Hüseyin, Rıdvan b. Abdullah ve gayruhum mine’l-huzzâr.