Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 227 Hüküm no: 306 Orijinal metin no: [45b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Toka’nın vârisi Tarandafilo’nun Yafol v. Apostol’dan alacağı olduğuna dair iddiası Zimmî tâifesinden olup bundan akdem hâlik olan Yani v. Toka nâm zimmînin sulbî kebîr oğlu ve hasran vârisi olan Tarandafilo nâm zimmî meclis-i şer‘-i hatîr-i lâzımü’t-tevkīrde sefîne reislerinden işbu bâ‘isü’t-terkīm Yafol v. Apostol nâm zimmî muvâcehesinde üzerine da‘vâ ve takrîr-i kelâm edip babam hâlik-i mezbûr hâl-i hayâtında mezbûr Yafol’a yüz yirmi üç kıt‘a riyâlî guruş ikrâz ve teslîm ol dahi iktirâz ve tesellüm edip meblağ-ı mezbûrdan yetmiş üç kıt‘a riyâlî guruşunu hâl-i sıhhatinde mezbûrun yedinden ahz u kabz edip zimmetinde bâkī kalan elli guruşdan iki guruşunu bana dahi def‘ ve teslîm etmiş idi. Hâlâ zimmetinde bâkī kalan kırk sekiz guruşu taleb ederim suâl olunsun dedikde gıbbe’s-suâl ve akībe’l-inkâr müdde‘î-i mezbûrdan da‘vâsına mutâbıka beyyine taleb olundukda ikāmet-i beyyineden ızhâr-ı acz ile istihlâf etmeğin mezbûr Yafol Reis müdde‘î-i mezbûrun babası hâlik-i merkūm Yani’den hâl-i sıhhatinde yüz yirmi üç kıt‘a guruş iktirâz edip meblağ-ı merkūm zimmetinde lâzımü’l-edâ deyni olmadığına cânib-i şer‘den yemîn teklîf olundukda ol dahi hasebi’l-mesûl yemîn bi’llâhillezî enzele’l-İncîle alâ-Îsa aleyhi’s-selâm etmeğin müdde‘î-i mezbûr Tarandafilo bilâ-vech ta‘arruzdan men‘ olunup mâ-vaka‘a bi’t-taleb ketb olundu. Fi’l-yevmi’l-âşir şehri Rebî‘ülâhir li-sene erba‘a ve sittin ve elf. Şuhûdü’l-hâl: Ali Beşe çukadâr, İbrahim Çelebi b. Davud, Pîrî b. Hüseyin, el-Hâc Şa‘ban b. Ahmed, Rıdvan b. Abdullah, Kara Halil b. Mehmed, ve gayruhum.