Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 228 Hüküm no: 308 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cevher b. Abdullah boşandığı eşini zevciyet muamelesi için zorlamaması Mahmiye-i İstanbul’da Samanveren Mahallesi’nde sâkine işbu bâ‘isü’l-kitâb Fâtıma bt. Abdullah nâm hatun meclis-i şer‘-i hatîr-i lâzımü’t-tevkīrde zevc-i mutallıkı olan Cevher b. Abdullah mahzarında üzerine da‘vâ ve takrîr-i kelâm edip zevcim mezbûr Cevher ile târîh-i kitâbdan iki ay mukaddem ma‘kūdün-aleyh olup zimmetinde mütekarrer olan üç yüz akçe mehr-i müeccelim ve iddet-i ma‘lûmem ve meûnet-i süknâm üzerine muhâla‘a-i sahîha-i şer‘iyye ile hul‘ eylemiş idik. Hâlâ mezbûr Cevher hul‘-ı mezkûru inkâr edip benimle izdivâc mu‘âmelesin eder, suâl olunup men‘ ile tenbîh olunmak matlûbumdur dedikde gıbbe’s-suâl mezbûr Cevher cevâbında fi’l-vâki‘ mezbûre Fâtıma ile târîh-i mezbûrda vech-i muharrer üzere hul‘ eylemiş idik deyü hul‘-ı mezbûrun vukū‘unu ikrâr u i‘tirâf etmeğin ikrâr mûcebince müdde‘iye-i mezbûre Fâtıma mezbûr Cevher’in mutallakası olup akd-i cedîde muhtâc olmağın mezbûr Cevher’e men‘ ile tenbîh olunup mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-şehri Cumâdelûlâ li-sene erba‘a ve sittin ve elf. Şuhûdü’l-hâl: Mustafa Efendi b. Mehmed el-imâm, İbrahim b. Mustafa, Mustafa b. Ahmed, Rıdvan b. Abdullah, İbrahim Çelebi b. Davud ve gayruhum mine’l-huzzâr.