Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 228 Hüküm no: 309 Orijinal metin no: [46a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud b. Mustafa’nın keten parasından alacağı olduğu İşbu bâ‘isü’l-kitâb Mahmud b. Mustafa nâm kimesne meclis-i şer‘-i hatîr-i lâzımü’t-tevkīrde Yahûd tâifesinden olup Mesine cemâ‘atinden İsak v. Sinyor nâm Yahûdi muvâcehesinde üzerine da‘vâ edip mezbûr İsak zimmetinde kıymet ve mikdârı beynimizde ma‘lûm keten bezi bahâsından bin dört yüz akçe hakkım vardır, suâl olunup alıverilmesi matlûbumdur dedikde gıbbe’s-suâl mezbûr İsak cevâbında fi’l-vâki‘ müdde‘î-i mezbûr Mahmud’a beynimizde kıymet ve mikdârı ma‘lûm keten bezi bahâsından zimmetimde lâzımü’l-edâ ve vâcibü’l-kazâ bin dört yüz akçe deynim vardır deyü ikrâr u i‘tirâf etmeğin ikrârı mûcebince meblağ-ı mezbûru müdde‘î-i mezbûr Mahmud’a edâ ve teslîme mezbûr İsak’a tenbîh-birle mâ-vaka‘a bi’t-taleb ketb olundu. Tahrîren fi’l-yevmi’r-râbi‘ ve’l-ışrîn min-Cumâdelûlâ li-sene erba‘a ve sittin ve elf. Şuhûdü’l-hâl: Ali Beşe çukadâr, Pîrî Beşe kāimmakām, el-Hâc Şa‘ban el-muhzır, Muharrem el-muhzır ve gayruhum.